Pleg-mor Bengal

Pleg-mor Bengal

Pleg-mor Bengal (e banglaeg বঙ্গোপসাগর, Bangópaságara, en hindieg बंगाल की खाड़ी, Bangála kí kháda, e telougoueg బంగాళాఖాతం, Bangálákhátam, e tamileg வங்காள விரிகுடா, Vankála virikutá, e saozneg Bay of Bengal) zo ul lodenn eus Meurvor Indez, e stumm un tric'horn, bevennet er c’hornôg gant Sri Lanka hag India, en hanternoz gant Bangladesh, er reter gant Birmania ha ledenez Malezia. E mervent Pleg-mor Bengal emañ enez Sri Lanka hag er gevred emañ an enezegoù Andaman ha Nikobar.

Kalz eus stêrioù India, a ya o dourioù war-zu ar reter, en em daol e Pleg-mor Bengal : en hanternoz ar Ganga, ar Meghna hag ar Brahmaputra, hag er c’hreisteiz ar Mahanadi, ar Godavari, ar stêr Krishna hag ar stêr Kaveri. Ur goadeg manglez vras, ar Sundarban, a gaver en delta stummet gant ar Ganga, ar Brahmaputra hag ar Meghna. Ar stêr Irrawaddy, e Birmania, en em daol e Pleg-mor Bengal ivez.

Porzhioù-mor bras zo war aodoù Pleg-mor Bengal : Chennai (anvet Madras gwechall), Vishakhapatnam, Chittagong, Kolkata (anvet Calcutta gwechall) ha Puducherry.