Eos

Eos (Έως pe Αύως e gregach) a oa un Ditanez, doueez tarzh an deiz ha mamm an Anemoi, an avelioù, e mojennoù kozh Hellaz.

Eos o redek war-lerc'h Titon, œnochoe atek gant al livour Akiles, v. 470–460 kent JK, mirdi al Louvre

Mojenn

Merc'h eo da Hiperion ha Teia, ha c'hoar eo da Helios (an Heol) ha da Selene (al Loar).

Dimezet eo da d-Titon, ha gantañ e krou Memnon hag Emation. Karet he deus Ares, ha gant-se he deus sachet warni kasoni Afrodit. Kondaonet eo bet gant an doueez da vezañ atav e karantez.

He c'harantezioù

E-touez ar re a garas:

• Orion,
• Kefal
• Aeolos, doue an avelioù
• an Titan Astraeos, a grou ganti ar pevar avel (Boreas, Notos, Euros ha Zefiros), hag ar stered.

Emañ o chom e-tal Okean, a zalc'h bed an dud. Bemdez, pa vez ar c'houlz d'an noz da echuiñ, e kuita gwele Titon, hag en he c'harr e red war-zu an Oabl da gemenn d'an doueed donedigezh he breur Helios. Hervez Homeros e vez Eos gantañ a-hed e zevezh. Da noz e tiskenn eus an Olimp da vont d'ar gêr, ha ganti e vez an Eurioù. En trajediennoù e klot gant Hemera, an deiz.

Alies e vez graet ῥοδοδάκτυλος / rhododáktylos (bizied ar roz) anezhi, pe κροκόπεπλος / krokópeplos (sae safranek) pe c'hoazh ἠριγένεια}} / êrigéneia (bugel ar beure).

War al listri pri e vez divaskell peurvuiañ. A-wechoù ivez he gweler gwisket gant ur ouel hag azezet en ur c'harr sachet gant pevar a gezeg.