Pepin Grenn

Pepin III, livet gant . le Louis Félix Amiel, urzhiet gant Louis Philippe evit ar mirdi Pépin le Bref

Pepin III, anavet ivez evel Pepin ar Berr pe Pepin Grenn^{(Daveoù a vank)} (dre ma oa bihan, a greder) (714-24 Gwengolo 768), a zo bet roue ar Franked (751-768). Ganet e oa e 714 (pe 715) e Jupille (e-kichen Liège), rak er c'hornad-se eus Belgia hiziv e veze ar Verovingidi o chom, e rouantelezh Aostrazia. Marvet eo e Sant-Denez, e-kichenik Pariz, e 768.

Mab yaouankañ Karl Martel ha Chrotrud (690-724) e oa. E dad a oa maer ar palez en Aostrazia. Bez' e voe:

• maer ar palez evel e dad,
  • e Neustria eus 741 da 751, a oa stag rouantelezhioù Bourgogn ha Provañs outi,
  • en Aostrazia eus 747 da 751,
• roue ar Franked (751-768).
• tad an impalaer Karl Veur (war-dro 742-814).

E vuhez

Pa varvas Karl Martel , e 741, e voe rannet e garg a vaer ar palez , hervez ar c'hiz frank, etre e zaou vab:

• Karloman a voe maer ar palez en Aostrazia,
• Pepin a voe maer ar palez en Neustria,

Grifon, trede mab Karl Martel n'en doe nemet un nebeud kontelezhioù .

Bugale

E 740, e timezas Pepin gant Bertrada Laon. Tri eus o bugale a oa chomet bev:

• Karl, a voe lesanvet Karl Veur (2 Ebrel 742-28 Genver 814)
• Karloman (751-4 Kerzu 771)
• Redburga
• Bertha, mamm ar c'hont Rolant

Pa varvas Karl Martel e 741, e voe rannet ar rouantelezh etre e vibien, Pepin ha Karloman. Bac'het en un abati e oa tri mab bastard Karl Martel, Grifo hag e vreudeur. Karloman a yeas da vanac'h e 747. Chom a reas Frankia etre daouarn Pepin pa oa Maer ar Palez dindan ar roue merovingat Hilderik III. Hilderik a oa roue, met Pepin a oa mestr an traoù ken e rene evel ar roue. Pepin a c'houlennas digant ar Pab piv a c'hellfe bezañ ar rieg : an hini en deus un titl roueel pe an hini a ziviz evel ma ra ur roue. Dre ma respontas ar Pab e oa pouezusoc'h an divizout eget an titl e teuas Pepin a-benn da vougañ an eneberezh ha dilennet e voe evel roue ar Franked gant pennoù uhelañ e bobl e kêr Soissons e 751. Marteze e voe olevet en iliz-veur e 752 gant Bonifas, arc'heskob Mainz.

Dre aloubiñ meur a vro e kreskas rouantelezh Pepin ken e teuas ar pab Steven III da Bariz d'e oleviñ ivez ha reiñ dezhañ an titl a Patrisian ar Romaned. Olevet e voe ivez mibien Pipin, Karl (Karl Veur pelloc'h) ha Karloman.

Evit trugarekaat ar pab ez eas Pepin da vrezeliñ ouzh al Lombarded dindan ar roue Aistolf. Rediet e voe al Lombarded, hag int kristenion disivouderion, da resteurel madoù an Iliz katolik roman. E 759 e skarzhas an Arabed kuit eus Bro-C'hall hag e kemeras Narbonne hag Akwitania diganto.

Marvet e oa Pepin e Saint-Denis e 768 hag interet eo bet e-barzh Penniliz Saint Denis asambles gant e wreg Bertrada.

Notennoù

En e raok: Childerig III

Rouaned ar Franked 751 – 768

War e lerc'h: Karl Veur