Jakez Kerrien

Jakez Kerrien
Anv ofisiel	Jacques Querrien
Anv pluenn	Jakez Kerrien
Obererezh	Beleg, romantour, kazetenner
Ganedigezh	e 1900 e Sant-Tegoneg, Breizh
Marv	e 1992 e Gwened, Breizh
Yezh skrivañ	Brezhoneg
Enorioù	Eil priz ar Bleun-Brug, 1922
Oberennoù pennañ
Ar roc'h toull
Traoù ouzhpenn
Dao dezo Pennadoù

Jakez Kerrien (Sant-Tegoneg, 1900 - Gwened, 1992) a oa ur skrivagner brezhonek.

Hennezh a oa unan eus ar skrivagnerion gentañ stag ouzh skol Walarn, bet war ar studi e skol tadoù Kalonoù-Sakr Picpus en Hondarribia, en Euskadi, a-gevret gant ar skrivagnerion arall Jakez Riou ha Youenn Drezen. Paneve pennadoù-skrid e meur a gelaouenn pe journal, ne skrivas Jakez Kerrien nemet ur romant, Ar Roc'h toull, koulz lavaret. War-lerc'h ha ken abre hag ar bloavezhioù 1930 e ouestlas e vuhez a-bezh d'an abostolerezh ha d'ar Feiz, evel beleg, kent mervel e 1992.

Buhez

D'ar bloavezh 1900 eo e voe ganet Jakez Kerrien e parrez Sant-Tegoneg (Bro-Leon), er gêriadenn a Bennaneac'h, en ur familh a gouerion baour.

Abalamour d'al lezennoù a voe votet war-lerc'h an disparti etre an Iliz hag ar Stad e voe serret skol Sarzhav e-men e veze stummet an doare-beleion yaouank ha neuze ez eas Jakez Kerrien da gloerdi tadoù a'r C'Halonoù Sakr Picpus, en Hondarribia, en Euskadi, e 1911, d'an oad a unnek vloaz, a-barzh mont da leandi Miranda de Ebro e Kastilha-Gozh e 1916, e-men e reas anaoudegezh gant Jakez Riou ha Youenn Drezen. Eno e studijont meur a yezh evel ar spagnoleg, al latin, ar galleg pe ar saozneg. An tad Müller, hag a oa unan eus beleion veur ar c'hloerdi, a aotreas Jakez Kerrien hag e gavandidi da beurzeskiñ ar brezhoneg. Kement-se a veze graet a-ziwar levrioù a zeolegezh hag Emgann Kergidu Lan Inizan. Kuitaat a reas al leandi-se e miz Eost 1919.

Anvet e voe Jakez Kerrien da gelenner e bro-Velgia, e 1919-1920. E-kerzh e goñje, graet gantañ e Gwened, e 1920, e reas anaoudegezh gant Roparz Hemon ha gant hemañ e vo lakaet e darempred gant Frañsez Vallée ha Meven Mordiern. War-lerc'h e amzer-soudard ez eas da Roma, e-lec'h ma heulias kentelioù doueoniezh ha prederouriezh, a-barzh bout beleget er bloaz 1926 e Sant-Tegoneg.

Yaouank e teraouas e vuhez a skrivagner hag abred hen echuas ivez. Aet e oa gantañ eil priz ar Bleun-Brug, e 1921, evit ur varzhoneg. Skrivañ a reas daou bennad-skrid evit Le courrier du Finistère, e 1922 ha 1923 : "Ar guziadenn aour" hag "Ar waz du". Embannet e voe e romant Ar roc'h toull e 1926, d'an oad a c'hwec'h vloaz warn-ugent, gant Gwalarn. Goude se ne skrivas ket nemet pennadoù a-zivout gwerzaouriezh. E 1930 e voe disoc'h e vuhez a skrivagner ha tolpañ a roas e evezh war e c'halvidigezh a veleg evit peurrest e vuhez.

E-pad hanter-kant vloaz e voe frer, aluzener e Tours ha kelenner e kloerdi bras Poitiers.

Mont a reas e retred en un ti beleion gozh eus e urzh e Sarzhav e 1983, ha mervel a reas e klañvdi Gwened er bloavezh 1992.

Oberennoù

Ar Roc'h Toull

Kinnig

Ar romant-se eo pennoberenn Jakez Kerrien. Honnezh zo ul levr berr a-walc'h, marzhus ha fentus war un dro, levezonet gant endro ar skrivagner : hini e vloavezhioù-skol ha hini e yaouankiz e bro-Leon. Ennañ e kaver mojennoù vreizhat ha menegoù eus ar sevenadur hollvedel.

Embannet eo bet, a-dammoù, trizek tamm anezhi, e-barzh Le courrier du Finistère (1925-1926) ha peuzgoude e-barzh Gwalarn (1926) hag adembannet gant Emgleo Breiz (1957, 1995). Ur romant berr an hini eo, skrivet e Roma, p'edo Jakez Kerrien war ar studi en ur skol renet gant ar Jezuisted.

Se zo ur romant a faltazi ("un danevell varzhus" hervez soñj Abeozen) e-men e kaver levezon lennadennoù ar skrivagner evel Dante pe prederourion a vro-C'hres, reoù an Akademiezh, lakaet asambles gant gerioù eeun yezh ar beizanted hag al levezon kristen. Ur meni romant-deskiñ eo, a-ouenn gant romantoù kevrinus ar skol romantik, skrivet en ur yezh "c'hwek ha pinvidik" hervez Fañch Morvannou.

Arroudenn

"Skuiz e oan pelloc'h o klevout ma zud o lavarout d'in bemdez :

-Te hag a blij d'it kement gwelout traou koz ar vro, n'out ket bet c'hoaz o sellout ouz ar Roc'h Toull. Che !

Ha me a blege va fenn gant ar vez, rak hen anzav a ranken, abaoe an amzer e oan o c'haloupat dre ar vro, n'em boa ket gwelet c'hoaz ar Roc'h Toull.

-Ret e vo d'in, emezoun-me d'in va-unan, mont da welout an estlamm-ze, an eizvet marzenn eus ar bed, paneve nemet evit lakaat an dud-man da rei peoc'h d'in gand o zorr-penn.

Siouaz ! an heol a zave bemdez a-zioc'h ar menez, hag a guze bemdez er mor; bemdez ivez eun abeg bennak a gase ac'hanoun gand eun hent na oa ket hent ar Roc'h Toull. An dervezioù am boa da chom er gêr a vije aet a-benn eun eizvetezenn. Aon am boa da lavarout kenavo d'am parrez hep beza bet an eurvad da welout gant va daou lagad ar burzud a lakae kement a varvailhou war deod ravorezed va fennkêr. Koulskoude an dra iskis-se ne c'hoarvezas ket." (Ar Roc'h Toull, Gwalarn, 1926)

Oberennoù arall

• Ma ouije-me skriva, barzhoneg, in Feiz ha Breiz, 1922.
• Ar guziadenn aour, barzhoneg, in Le courrier du Finistère, 1922.
• Ar waz dour, barzhoneg, in Le courrier du Finistère, 1923.
• Dao dezo, pezh-c'hoari, in Breiz Atao.
• Penn ar c'hreisteiz, barzhoneg, in Gwalarn, niverenn 4.
• Ha reiz eo ar Werzaouriez Vreizek ?, pennad-skrid, in Gwalarn, niv. 12, 1927.
• Pennad-kaoz gant Jakez Kerrien : Re, re em-bije karet ar brezhoneg, in Le Peuple Breton n° 287, 288 et 289 (Kerzu 1988 - Genver 1989).

Studiadennoù a-zivout Jakez Kerrien

• Roparz Hemon, Gwalarn Nnn 5, pennad-barn war Ar Roc'h Toull, 1926.
• Fañch Morvannou, Notes sur Ar Roc'h Toull de Jakez Kerrien, Skol Vreiz, Nnn40-41, 1972.
• Fañch Morvannou, Les novices du père Wilfrid Müller, HLCB, tamm 3, 1987.
• Fañch Morvannou, Le dernier des trois, ARMORICA, Ethnologie et Sciences Humaines, Nn 6, 1997.
• Youenn Olier, Deizlevr brezel I (kaier miz Du), 1969.
• Youenn Olier, Sol Walarn, Imbourc'h, eil levrenn, 1975.