David Malcolm Lewis

David Malcolm Lewis

den

Reizh pe jener	paotr
Bro ar geodedouriezh	Rouantelezh-Unanet
Anv-bihan	David, Malcolm
Anv-familh	Lewis
Deiziad ganedigezh	7 Mez 1928
Lec'h ganedigezh	Londrez
Deiziad ar marv	12 Gou 1994
Lec'h ar marv	Oxford
Yezhoù komzet pe skrivet	saozneg
Yezh implijet dre skrid	saozneg
Micher	classical scholar, istorour, kelenner skol-veur
Bet war ar studi e	Corpus Christi College
Ezel eus	British Academy
Prizioù resevet	Fellow of the British Academy

 

 Eus Wikidata

David Malcolm Lewis FBA, ganet d'ar 7 a viz Even 1928 e Londrez hag aet da Anaon d'an 12 a viz Gouhere 1994 en Oxford, a oa un istorour saoz hag ur c'helenner istor an Henamzer e Skol-veur Oxford. Brudet eo dre e labour ramzel a-zivout an enskrivadurioù henc'hresianek en Aten hag Attika, A Selection of Greek Historical Inscriptions: To the End of the Fifth Century B. C. (1969). Ken ledan ha ken don e oa e ouiziegezh ma voe pedet e-pad meur a zek vloaz gant gouizieien all da zisplegañ ha da wellaat an darn vrasañ eus al levrioù a veze embannet war dachenn istor Henc'hres a-raok ma vefent embannet.

Buhez

E Londrez e voe ganet David Malcolm Lewis d'ar 7 a viz Even 1928. Goude bezañ bet skoliataet er City of London School, ur skol brevez bet staliet eno e 1442, e voe studier er skol-veur Corpus Christi College en Oxford da dapout un aotreegezh. Eno, emezañ, e voe unan eus an dud diwezhañ o vezañ aotreet da labourat hep bezañ rediet da lakaat e anv evit un diplom uheloc'h ; a-stur gant e studi e prientas un doktorelezh dre lizher war an Henamzer e Skol-veur brevez Princeton (New Jersey). Studiañ a reas ivez en Institute for Advanced Study e Princeton ivez, er British School en Aten, hag e Christ Church, ur rann eus Skol-veur Oxford.

Ur gouizieg war Henc'hres e oa David M. Lewis. Gant enskrivadurioù e plede dreist-holl, hogen kerkent ha 1967 e tisklêrias e oa arabat lezel studi an enskrivadurioù gant an dud desket warno dija, ret e oa e vefe un doare a-douez reoù all da beurgompren e bed an Henamzer. En em arastiñ a reas ouzh skridoù a veze kavet diaes gant e genseurted : kontoù dispignoù ha renabloù teñzorioù azeuldioù, da skouer ; ken don ec'h eas en danvez ma studias ivez teulioù eus ar Reter, evel tablezennoù Persepolis

Dre ma oa ur Yuzev anezhañ e labouras ivez war un eil tachenn-studi : istor ar Reter-Kreiz.

Lorc'h a oa e David Malcolm Lewis goude embannadur e labour war Henc'hres e teir levrenn en eil embannadur The Cambridge Ancient History. Ul levr all, Sparta and Persia, a embannas e 1977, hag ur studiadenn verroc'h, The Jews of Oxford, e 1992. Ur pennskridaozer e voe ivez evit meur a oberenn embannet gant Skol-veur Oxford war dachenn ar studioù klasel, en o mesk The Decrees of the Greek States, a voe embannet e 1997, goude e dremenvan neuze. Kantadoù a skridoù-barn a embannas ivez.

D'an 12 a viz Gouhere e varvas ar gouzieg en Oxford, d'an oad a 66 vloaz. E Wolvercote Cemetery emañ e vez.

Red-micher

• 1949-1951 : amzer soudard er Royal Army Educational Corps (RAEC).
• 1951-1952 ha 1964-1965 : ezel ouzh an Institute for Advanced Study e Princeton.
• 1952-1954 : studier er British School en Aten.
• 1954-1955 : enklasker e Corpus Christi College Oxford.
• 1955-1985 : rener ar studi war an henistor e Christ Church, Oxford.
• 1956-1994 : studier e Christ Church.
• 1956-1985 : prezegenner war enskrivadurioù Henc'hres e Skol-veur Oxford.
• 1985-1994 : kelenner war an henistor e Skol-veur Oxford.

Oberennoù pennañ

Aozer

• 1968 : Sir Arthur Pickard-Cambridge, The Dramatic Festivals of Athens – eil embannadur, a-gevret gant ar gouizieg John Gould (1927-2001).
• 1969 : Greek Historical Inscriptions – a-gevret gant an istorour Russell Meiggs (1902-1989).
• 1977 : Sparta and Persia.
• 1981-1994 : Inscriptiones Graecae.
• 1992 : The Jews of Oxford.

Pennskridaozer

• 1988 : Cambridge Ancient History, levrenn IV.
• 1992 : Cambridge Ancient History, levrenn V.
• 1994 : Cambridge Ancient History, levrenn VI.

Dalif

• Selected Papers in Greek and Near Eastern History, kendastumet gant an istorour Peter John Rhodes (1940-2021).

Liammoù diavaez

• (en) Encyclopedia Iranica