DShK

DShK
Ur vindrailherez DShK war un trebez
Kinnig
Bro orin	URSS
Doare	Mindrailherez ponner
Mont en-dro	Tennata dre amprest gazoù, dre biston
Munisionoù	12,7 × 108 mm 12,7 × 99 mm NATO (Roumania)
Bloavezh krouidigezh	1938
Produer	Uzin armoù Toula
Mare produiñ	1938-1980
Mare implij	Abaoe 1938
Perzhioù teknikel
Mas (hep kartouchenn na fust ebet)	34 kg
Hirder	1.625 mm
Hirder ar c'hanol	1.070 mm
Lusk-tennañ	600 tenn/mn
Hed-tenn efedus	2.000 m
Hed-tenn d'ar muiañ	2.500 m
Tizh mont e-maez ar boledoù	850 m/s
Endalc'h	Gourizoù metalek 50 kartouchenn
Adstummoù nesañ	DShKM
Lezenn
Rummad e Bro-C'hall	A

An DShK (e rusianeg ДШК, berradur Дегтярёва-Шпагина крупнокалиберный, Degtyaryova-Chpagina krupnokaliberny, e brezhoneg "Kalibr uhel Degtyariev-Chpagin") zo ur vindrailherez ponner ijinet er bloavezhioù 1930 en URSS. Implijet eo bet gant an arme ruz e-pad an Eil Brezel-bed, ha gant kalz broioù hag a oa dindan levezon Bloc'h ar Reter war-lerc'h. Degadoù a vroioù, en Afrika dreist-holl, a ra ganti hiziv-an-deiz c'hoazh.

Istor

E dibenn ar bloavezhioù 1920 e fellas d'an URSS pourveziañ hec'h arme gant ur vindrailherez ponner. Ur stumm kentañ, anvet DK, a voe savet gant an ijinour Vasiliy Degtiarev en ur gemer harp war ur fuzuilh-vindrailher DP-27 kreñvaet evit tennañ kartouchennoù 12,7 × 108 mm uhel o c'halibr. Georgiy Chpagin a sikouras war-lerc'h da wellaat sistem pourveziañ an arm. An arm nevez a voe anvet DShK-38, diwar o anvioù hag ar bloaz ma voe degemeret en arme soviedel.

Un DShK savet war un tank T-55.

Implijet e voe an DShK evel arm enepnijerez war talbenn ar reter e-pad an Eil Brezel-bed, savet war trebezioù pe war karbedoù. Stadunaniz a ziskoachas anezhi da vare brezel Korea (1950-1953), pa zeuas an DShK da vezañ mindrailherez ponner kalz broioù komunour pe dost da vare ar Brezel Yen. E brezel Viêt Nam e voe implijet gant ar gomunourien a-enep biñsaskelloù arme ar Stadoù-Unanet.

Sinaiz a savas ur gopienn eus an DShK anvet Stumm 54. Armoù a seurt-se a voe implijet gant Afghaniz a-enep Soviediz er bloavezhioù 1980. An IRA iwerzhonat a dapas skouerennoù eus an DShK adalek 1988, dre Libia peurgetket ; gante e teujont a-benn da zistruj biñsaskelloù ha karbedoù hobregonet breizhveuriat. Implijet e vez c'hoazh gant Ukraina a-enep Rusia abaoe aloubadeg ar vro e 2022.

Lesanvet e oa an arm душка (douchka, "karedig") gant rusianegerien. Soudarded stadunanat a rae gant Red fifty ("hanter-kant ruz") evit envel anezhañ, en abeg d'e galibr ha d'e lec'h orin.

Ar mindrailherezioù NSV (1971) ha Kord (1998) o deus kemeret plas an DShK e armeoù URSS ha Rusia, met n'eo ket bet dilezet homañ penn-da-benn gante c'hoazh.

Deskrivadur

An DShK zo ur vindrailherez yenaet dre aer, dezhi ur sistem tennata dre biston. Pourveziet eo gant gourizoù 50 kartouchenn. Ul lusk-tennañ 600 tenn/mn zo dezhi, ha gellet a ra tennañ betek 2.500 metr. Heñvel eo stumm he draen ouzh hini ar Browning M2 stadunanat. Abalamour d'he fouez (34 kg hep kartouchenn ebet) e rank bezañ savet war ur fust evit bezañ implijet : un trebez ispisial zo dezhi.

Ur stumm modernoc'h anvet DShK 1938/46, pe DShKM, zo bet produet goude dibenn an Eil Brezel-bed. Kemmoù a oa bet degaset da veg ha da sistem pourveziañ an arm. Ur stumm kambret e 12,7 × 99 mm, kalibr standart armeoù AFNA, zo implijet gant arme Roumania ivez.

• 
  Un DShK savet war ul lestr-tarzher G-5 eus morlu an URSS (1944).
• 
  Ar vindrailherez savet war an tren hobregonet soviedel Jelezniakov a-enep nijerezed (miz Mae 1942).
• 
  Un DShKM war ur c'harbed roumanat modern.
• 
  Ur soudard ukrainat oc'h implijout an arm en un diskouezadeg (2010).

Levrlennadur

• (en) LAWRENCE Eric, Practical Guide to the Operational Use of the DShK Machine Gun, 2014, 84 p., ISBN 978-1941998038

Daveennoù

  Stag eo ar bajenn-mañ ouzh Porched an Armoù-tan