Colt Dragoon
| Colt Dragoon | |
|---|---|
 Ur revolver Colt Dragoon pourveziet d'an U.S. Cavalry | |
| Kinnig | |
| Bro orin |  Stadoù-Unanet Amerika |
| Doare | Revolver |
| Mont en-dro | Platinenn-skeiñ un-ober |
| Munisionoù | Boledoù krommvegek .44 meutad |
| Produer | Colt's Patent Firearms Manufacturing Company |
| Mare krouidigezh | 1848-1850 |
| Mare produiñ | 1848-1860 |
| Niver produet | War-dro 18.500 |
| Perzhioù teknikel | |
| Mas | 1,93 kg |
| Hirder | 375 mm |
| Hirder ar c'hanol | 190 mm |
| Hed-tenn efedus | War-dro 70 m |
| Tizh mont e-maez ar boledoù | Etre 259 ha 377 m/s hervez ar boled hag ar gargad poultr |
| Endalc'h | Taboulin 6 tenn |
| Lezenn | |
| Rummad e Bro-C'hall | D |
Ar Colt Dragoon zo ur heuliad revolverioù un-ober ijinet e dibenn ar bloavezhioù 1840 gant Samuel Colt. Savet e oa bet evit ar marc'hegerezh. An armoù-mañ eo a roas lañs d'ar Colt's Manufacturing Company da vat er bloavezhioù 1850, pa c'hellas Samuel Colt lakaat sevel e uzin a-drugarez d'ar revolverioù Dragoon urzhiet gant an arme[1].
Istor
[kemmañ | kemmañ ar vammenn]E 1847 en doa Samuel Colt ijinet ar revolver Colt Walker, asambles gant ar c'habiten marc'hegerezh Samuel Hamilton Walker. Ouzhpenn 1000 skouerenn anezhañ a voe produet, met siek e oa : re uhel e oa ar gargad poultr du a c'halled lakaat e pep hini eus kambroù e daboulin (war-dro 4 gram) ha techet e oa an arm da darzhañ. Divizet e voe neuze berraat kambroù an daboulin evit izelaat ar c'hementad a boultr enne. Diwar-se e voe krouet ar Colt Whitneyville-Hartford Dragoon, anvet Transition Walker ivez, hendad an Dragoon, a voe savet 240 skouerenn anezhañ e 1848[2]. Implijout a rae pezhioù eus ar Colt Walker, ha produet e oa c'hoazh e atalieroù Eli Whitney Jr. e Whitneyville, evel ar Walker.
Goude un nebeud gwelladennoù e voe produet tri stumm eus an arm nevez, dezhe disheñvelderioù bihan war ar pontig hag an daboulin hepken [3]:
- First Model Dragoon (produet e 1848-1849) : 7000 skouerenn ;
- Second Model Dragoon (1850-1851) : 2700 skouerenn ;
- Third Model Dragoon (1851-1861) : 10500 skouerenn.
Implijet e voe ar Colt Dragoon gant unvezioù a bep seurt en arme stadunanat betek ar Brezel Diabarzh da nebeutañ. Skouerennoù all, warne treset ur steredenn, a voe produet evit ar marc'had sivil saoz etre 1853 ha 1856 : un daou c'hant bennak anezhe a voe adkaset da uzin Colt e Hartford e 1861 evit souten an Unaniezh da vare ar Brezel Diabarzh[2].
Ur pempvet doare Dragoon, anvet US Walker Replacement Dragoon, a voe produet 300 skouerenn anezhañ e 1847-1848 evit kemer plas ar Colt Walker a oa tarzhet o zaboulin pe o c'hanol. Kopiennoù eus ar Colt Dragoon a vez produet gant an embregerezh italian Uberti hiziv an deiz[3].
Deskrivadur
[kemmañ | kemmañ ar vammenn]Ar Colt Dragoon a oa dezhe ur c'hanol 190 mm (7,5 meutad) hag un daboulin 6 kambr, hag a c'halle degemer 6 boled krommvegek kalibr .44 hag o c'hargad poultr du. Ur blatinenn-skeiñ un-ober a oa dezhañ. War daboulin skouerennoù 'zo e oa engravet tresadenn un emgann etre soudarded an Texas Rangers hag Indianed. E framm a oa e dir hag e laton, hag e zornikell e koad-kraoñ[1].
Gwelet ivez
[kemmañ | kemmañ ar vammenn]- Colt Baby Dragoon, ur stumm bihanet eus an arm.
Er sevenadur
[kemmañ | kemmañ ar vammenn]- Stummoù ar Colt Dragoon a c'haller gwelet er filmoù Bandidas (2006), Lucky Luke (2009) ha True Grit (2010) da skouer[4].
Levrlennadur
[kemmañ | kemmañ ar vammenn]- (en) SERVEN James, Colt Dragoon Pistols: A Saga Of The Six-Shooter And The Trails It Blazed, Kessinger Publishing, 2010, 60 p., ISBN 978-1163184530
Daveennoù
[kemmañ | kemmañ ar vammenn]- 1 2 (fr) HOUSTON Rob, STROYAN Christine (renerezh), Armes à feu de légende, Larousse, 2019, p. 88-89
- 1 2 (en) KOLANDER Joel R., Colt Dragoon: History and Variations, Rock Island Auction (lennet d'an 18/07/2025)
- 1 2 (fr) BIANCHI Didier, Dragoon de Uberti en cal. 44, Cibles n°659, miz Mae 2025, pp. 81-85
- ↑ (en) Colt Dragoon, IMFDB (lennet d'an 18/07/2025)
