Carl Walther GmbH

Carl Walther GmbH
Krouidigezh	1886
Saver	Carl Walther
Sez sokial	Zella-Mehlis (betek 1945) ; Ulm (abaoe 1949) Alamagn
Produioù	Armoù-tan
Kevredigezh e penn	PW Group
Lec'hienn Internet	carl-walther.com

Evit krouer an embregerezh, gwelet Carl Walther.

Walther zo ur produer armoù-tan alaman savet e 1886 e Zella-Mehlis (Thüringen). E Ulm emañ sez sokial an embregerezh bremañ.

Istor

Carl Wilhelm Freund Walther a zigoras e stal fuzuilhoù gentañ e 1886 e Zella-Melhis (Thüringen). Kregiñ a reas e 1908 da broduiñ pistolennoù asambles gant e vab henañ, Fritz Walther. Ar patromoù kentañ eus 1 da 5 hag eus 7 da 9 a oa kambret e .25 ACP ha .32 ACP. Ar patrom 6 e oa an hini kentañ gant Walther kambret e 9 mm Parabellum ; ne reas ket berzh hag ur mil bennak a voe produet nemetken. Fritz Walther a gemeras penn an embregerezh goude marv e dad e 1915.

E 1929 e krogas da broduiñ ar rummad pistolennoù brudet Walther PP Polizeipistole (pistolennoù polis). E 1931 e kendalc'has gant ar PPK kentañ (Polizeipistole Kriminalmodell, da lavaret eo « pistolennoù evit an ensellerien »). An daou rummad PP ha PPK a oa kambret e .22 Long Rifle, .32 ACP, .380 ACP hag un nebeud anezho e .25 ACP. Ar PP a oa ar pistolennoù kentañ produet a-rummadoù gant teknik ar c'hoagañ. E 1938 e voe dibabet ar Walther P38 e 9 mm gant ar renad nazi evit kemer plas al Luger P08 implijet er Wehrmacht.

Eil Brezel-bed

Adalek 1942 betek 1945 e voe implijet prizonidi kamp-bac'h Neuengamme gant an embregerezh. Ul labouradeg a voe savet war-eeun er c'hamp. E dibenn an Eil Brezel-bed e voe distrujet labouradegoù an embregerezh ha lakaet Zella-Mehlis en takad soviedel. Ne chome nemet steuñvioù ha brevedoù armoù diwar Walther. Fritz Walther a adkrogas pep tra en-dro hag a savas ul labouradeg en Ulm (Republik Kevreadel Alamagn). Abalamour d'ar berzioù war ar produiñ armoù e krogas da sevel mekanikoù-jediñ ha prestik goude armoù dre aer gwasket^[1].

Emdroadur eil hanterenn an XXvet kantved

E 1957 e adkrogas Walther da broduiñ ar P38, adanvet P1, evit pourveziñ ar Bundeswehr gant armoù-dorn. Fritz Walther a varvas e 1966. E vab Karl-Heinz a gasas produiñ an embregezh war-zu an armoù sport.

E 1993 e voe prenet Walther gant Umarex Sportwaffen (bremañ ur rann eus PW Group), eus Arnsberg, e Nordrhein-Westfalen. Kopiennoù eus kalz armoù Walther a voe savet gant Umarex. An hini kentañ anezhe a oa ar CP88, kopienn ar Walther P88. Kendalc'het e voe ar produiñ armoù-tan dindan an anv Walther en Ulm hag en Arnsberg.

E 1999 e teuas an embregerezh stadunanat Smith & Wesson da vezañ enporzhier Walther e Stadoù-Unanet Amerika. PW Group a savas e 2012 Walther Arms, Inc. e Fort Smith (Arkansas), e bal gwerzhañ armoù Walther er Stadoù-Unanet. Abaoe 2021 e werzh Walther ur rummad pistolennoù marc'hadmat anvet PDP hag a glask keveziñ gant ar Glock.

Produioù

Pistolennoù

Walther PP
Walther PPK
Walther P38 / P1 / P4 / P5
Walther TPH
Walther P88
Walther P22
Walther PPS
Walther PK 380
Walther SP 22
Walther PPQ
Walther PDP

Pistolennoù dre aer gwasket

Walther LP53

Fuzuilhoù

Walther G43
Walther G22
Walther WA 2000

Karabinennoù

Walther KKJ

Karabinennoù dre aer gwasket

Sevenadur

Ar Walther PPK eo arm muiañ-karet ar spier saoz James Bond.

Liammoù diavaez

Lec'hienn Walther en Europa

Daveennoù

↑ (en) The First Century, lec'hienn an embregerezh Carl Walther
↑ (fr) McNAB Chris, Armes à feu Encyclopédie visuelle, p. 127. Elcy Éditions, 2011 (ISBN 2-7532-0521-3)

Stag eo ar bajenn-mañ ouzh Porched an Armoù-tan

[1] (en) The First Century, lec'hienn an embregerezh Carl Walther

[2] (fr) McNAB Chris, Armes à feu Encyclopédie visuelle, p. 127. Elcy Éditions, 2011 (ISBN 2-7532-0521-3)

[1]

[2]