Mont d’an endalc’had

Côte-Nord

Eus Wikipedia
Côte-Nord
administrative region of Quebec
Anv annezidiNord-Côtier, Nord-Côtière Kemmañ
StadKanada Kemmañ
Kêr-bennSept-Îles Kemmañ
E tiriadKebek Kemmañ
Lec'hiadurLabrador Peninsula Kemmañ
Daveennoù douaroniel50°52′0″N 65°49′0″W Kemmañ
A zo stok ouzhNord-du-Québec, Saguenay–Lac-Saint-Jean Kemmañ
Lec'hienn ofisielhttps://tourismecote-nord.com/ Kemmañ
Roll monumantoùQ19365697, list of historic places in Côte-Nord Kemmañ
Code09 Kemmañ
Map

Côte-Nord (Aod Norzh) zo ur rannvro velestradurel eus proviñs Kebek, e Kanada. Emañ etre proviñs Douar-Nevez ha Labrador er reter ha rannvro kebekat Saguenay–Lac-Saint-Jean er c'hornôg. An eil rannvro kebekat vrasañ eo goude Nord-du-Québec. Poblet eo dreist-holl war ribl stêr ha Pleg-mor Sant-Laorañs, eus Tadoussac betek an harzoù gant Labrador.

Istor

[kemmañ | kemmañ ar vammenn]
Gwel eus aod Côte-Nord, e Natashquan, war ribl Pleg-mor Sant-Laorañs.

Eus ar XIVvet d'ar XVIIvet kantved e oa darempredet ingal aod Pleg-mor Sant-Laorañs gant Europiz, dreist-holl pesketaerien eus Breizh hag Euskadi. E-pad an trevadennerezh europat er XVIvet ha XVIIvet kantved e veze komzet ur yezh innuek gant ar pobloù engenidik.

Betek donedigezh an Eil Brezel-bed (1939-1945) e c'hoarvezas kresk ar boblañs a-gevret gant diorren ar greanterezh paper. Er bloavezhioù 1950, ar mengleuzioù a zesachas kalz enbroidi.

"...Eus Kegashka da Blanc-Sablon, an annezidi a zo hiniennelourien, o chom war Douaroù ar Gurunenn — alies evel skwaterien — ha mirout a reont gant gwarizi o lec'hioù pesketa emren, alese o annez strewet." (Bussières, P., p.1, 1963)[1]

Krouet e voe ar rannvro velestradurel e 1966.

Douaroniezh

[kemmañ | kemmañ ar vammenn]

Er rannvro velestradurel emañ diazadoù doureier an holl stêrioù a red da aber ar Sant-Laorañs etre Tadoussac ha Blanc-Sablon. An eil rannvro vrasañ e Kebek eo Côte-Nord goude Nord-du-Québec. En em astenn a ra he gorread war 351 615 km², ha 236 664 km² anezho a zo douaroù[2], se zo 21% eus tiriad Kebek. Dave a ra an anv d'ar fed emañ ar rannvro war aod norzh stêr Sant-Laorañs ha pleg-mor Sant-Laorañs, etre genoù ar stêr Saguenay ha rannvro Labrador. Enni e kaver ivez Enez Anticosti, an enezenn vrasañ e Kebek.

Er c'hornôg emañ rannvro Saguenay–Lac-Saint-Jean, er reter proviñs Douar-Nevez ha Labrador, en norzh rannvro Nord-du-Québec hag er su rannvroioù Gaspésie–Îles-de-la-Madeleine ha Bas-Saint-Laurent.

Menez uhelañ ar rannvro eo Menez Veyrier, gant 1 104 m a uhelder, e aradennad menezioù al Laurentides.

Gwarez ar glad naturel

[kemmañ | kemmañ ar vammenn]

Meur a dachenn eus rannvro Côte-Nord a zo gouestlet dreist-holl da wareziñ ha da zerc'hel ar vevliesseurted. Er rannvro ez eus 262 annez loened gouez, 172 takad evned-dour, 12 lec'h evit ar c'herc'heized, 66 kludadoù laboused-mor war inizi, ledinizi pe tornaodoù, 4 annez razhed-musk hag 8 takad evit mirout kariakoued war Enez Anticosti[3].

  • Glad douaroniel
  • Park mor Saguenay–Sant-Laorañs
    Park mor Saguenay–Sant-Laorañs
  • Goudor tremeniat Watshishou
    Goudor tremeniat Watshishou
  • Mirva Park Broadel Archipel-de-Mingan
    Mirva Park Broadel Archipel-de-Mingan
  • Stêr Sault Plat
    Stêr Sault Plat
  • Enez Anticosti, glad bedel an UNESCO
    Enez Anticosti, glad bedel an UNESCO

Poblañs

[kemmañ | kemmañ ar vammenn]
Emdroadur keñveriet "Kumunioù Rannvroel ar Gontelezh" Côte-Nord.

Etre 1951 ha 1981 e kreskas kalz niver an annezidi e Côte-Nord, o tric'hementiñ he foblañs. Dont a ra ar c'hresk demografikel-se eus greanteladur ar rannvro, diazezet war korvoiñ ha treuzfurmiñ kentañ he danvezioù naturel (koadeier, mengleuzioù houarn ha titan, dourdredan). E 2006 e oa ar feur genel 10,8%, ha 6,3% ar feur mervel.

E daou bol kêrel ha greantel dreist-holl e oa bet ar c'hresk e-kerzh ar prantad-se : Baie-Comeau ha Sept-Îles. Displegañ a ra kement-se an diforc'h bras a weler e kresk poblañs ar pevar MRC eus an Aod Norzh. Tra ma voe e "Kumun Rannvroel a Gontelezh" (Municipalité régionale de comté, MRC) Sept-Rivières ur c'hresk hep e bar e Kebek etre 1951 ha 1981, o vont eus 5 394 da 47 114 a annezidi, hag e MRC Manicouagan e voe tric'hementet ar boblañs e-kerzh ar prantad-se, e MRC Haute-Côte-Nord ha Minganie-Basse-Côte-Nord ne greskas ar boblañs nemet un tammig bihan, nebeutoc'h eget feur kresk Kebek. Adalek 1981, diaesterioù ekonomikel ar greanterezh bras ​​(dreist-holl serriñ ar mengleuzioù e Gagnon ha Schefferville) a gasas d'un digresk bras eus ar boblañs en holl MRCoù eus Côte-Nord, ha dreist-holl e MRC Sept-Rivières, ma voe kollet 9000 a annezidi dindan 10 vloaz. Goude ur c'hresk bihan eus ar boblañs etre 1991 ha 2001 e voe kadarnaet an digresk a oa kroget e 1981 e niveradeg diwezhañ Kanada e 2006, hag a ziskouezas un digresk a 1,9% eus ar boblañs e-kerzh 5 bloaz.

Kumun Rannvroel a Gontelezh 1951 1961 1971 1981 1991 2001 2006
La Haute-Côte-Nord 10 839 15 162 14 952 14 668 13 303 12 894 12 303
Manicouagan 12 413 20 091 32 001 35 357 34 232 33 620 33 052
Sept-Rivières - Caniapiscau 5 394 19 467 29 140 47 114 38 287 38 931 38 661
Minganie - Basse-Côte-Nord 8 696 10 249 11 491 11 530 10 913 12 321 11 895
Hollad Côte-Nord 37 342 64 969 87 584 108 669 96 735 97 766 95 911

An diaesterioù ekonomikel er gennad kentañ hag er gennad greantel a ziskouez perspektivennoù demografikel negativel war hir dermen, gant un digresk poblañs rakwelet a 18% etre 2001 ha 2026, hervez Ensavadur Stadegoù Kebek.

Melestradurezh

[kemmañ | kemmañ ar vammenn]

Rannet eo Côte-Nord e c'hwec'h Kumun Rannvroel a Gontelezh ("Municipalité Régionale de Comté" pe MRC) ma kaver : 33 c'humun lec'hel, 10 tiriad diaoz ha 10 mirva indian evit un hollad a 53 c'humun.

"Kumunioù rannvroel a gontelezh" Côte-Nord
Anv Pennlec'h Poblañs Gorread douarel Stankter Dav.
Caniapiscau Fermont 3 882 79 253,6 0,05 [1]
La Haute-Côte-Nord Les Escoumins 10 278 12 430,9 0,83 [2]
Le Golfe-du-Saint-Laurent Côte-Nord-du-Golfe-du-Saint-Laurent 3 382 40 654,62 0,08 [3]
Manicouagan Baie-Comeau 30 158 39 246,4 0,77 [4]
Minganie Havre-Saint-Pierre 6 467 92 546,05 0,07 [5]
Sept-Rivières Sept-Îles 34 358 32 571,6 1,05 [6]
Rannvro 88 525 300 281,83 0,29 [7]

Tud brudet

[kemmañ | kemmañ ar vammenn]

Skeudennaoueg

[kemmañ | kemmañ ar vammenn]

Liammoù diavaez

[kemmañ | kemmañ ar vammenn]

Notennoù ha daveoù

[kemmañ | kemmañ ar vammenn]
  1. ↑ The population of the North Shore
    (fr, en)
    pp. 1, 25 of 37. Quebec geography notebooks (1963). “when agriculture dominates, the « rang » System of rural settlement is prevalent; below Sept-lies, the population concerned with fishing bas settled in small nuclei at short distance from its fisheries.”
  2. ↑ Kebek - Le Québec chiffres en main 2018
  3. ↑ Poltred Tiriadel - Aod-Norzh, 28 a viz C'hwevrer 2007, p. 26 diwar 94
Adtapet diwar « https://br.wikipedia.org/w/index.php?title=Côte-Nord&oldid=2150682 »