Browning M1917
| Browning M1917 | |
|---|---|
.jpg) Ur vindrailherez Browning M1917 (stumm kentañ) war he zrebez | |
| Kinnig | |
| Bro |  Stadoù-Unanet
|
| Doare | Mindrailherez |
| Mont en-dro | Tennata dre argil, yenaet dre zour |
| Munisionoù | Stumm orin .30-06 Springfield Stummoù all 6,5 × 54 mm Mannlicher-Schönauer 6,5 × 55 mm Mauser 7,5 × 54 mm 1929C 7 × 57 mm Mauser 7,62 × 51 mm NATO 7,65 × 53 mm Mauser 7,92 × 57 mm Mauser 7,92 × 61 mm 8 × 52 mm R Siam 8 × 63 mm |
| Ijiner | John Browning |
| Produerien | Colt's Manufacturing Company Remington Westinghouse |
| Mare produiñ | 1917-1945 |
| Mare implij | 1917 - bloavezhioù 1970 |
| Pouez ha muzulioù (stumm A4) | |
| Mas hollek (gant he zrebez, an dour hag he munisionoù) | 47 kg |
| Hirder | 980 mm |
| Hirder ar c'hanol | 610 mm |
| Perzhioù all | |
| Hed-tenn pleustrek | 1.400 m |
| Lusk-tennañ | 450 tenn/mn 600 tenn/mn (stumm M1917A1) |
| Tizh o vont e-maez | 853 m/s |
| Endalc'h | Gourizoù 250 kartouchenn |
| Lezenn | |
| Rummad e Bro-C'hall | A |
Ar Browning M1917 zo ur vindrailherez ijinet gant ar Stadunanad John Browning e deroù an XXvet kantved hag implijet gant arme ar Stadoù-Unanet ha kalz broioù all etre 1917 hag ar bloavezhioù 1970.
Istor ha deskrivadur
[kemmañ | kemmañ ar vammenn]
Pa grogas ar Stadoù-Unanet er Brezel-bed Kentañ e 1917 e oa pourveziet o arme gant mindrailherezioù diwar-lerc'h bet savet e dibenn ar c'hantved kent, evel ar Browning M1895. War an dachenn e voe implijet reoù savet gant o c'hevredidi gall pe saoz kentoc'h. John Browning a ginnigas neuze ur vindrailherez diorroet gantañ abaoe 1900[1]. Evit he sevel en doa dilezet tennata dre amprest-gazoù an M1895 evit ober gant ur sistem dre argil fiziaploc'h. Yenaet e oa dre zour, ha kambret e oa e .30-06 Springfield, ur c'halibr implijet dija e fuzuilhoù Springfield M1903 an arme[2]. Pourveziet e oa gant gourizoù lien 250 kartouchenn.
Ar pimpatrom kentañ a voe amprouet er memes bloavezh gant an arme, ha gouest e voe da dennañ 20.000 boled diouzh renk hep terriñ[3]. Choazet e voe buan-tre evel mindrailherez nevez. An embregerezh Colt, a oa perc'henn war gwirioù an arm, ne broduas nemet ul lodenn vihan (war-dro 600) eus ar 56.610 skouerenn savet betek fin 1918. Ar braz anezhe a voe produet gant Remington ha Westinghouse[1].
Stummoù all
[kemmañ | kemmañ ar vammenn]Ur stumm yenaet dre aer evit bezañ savet war ar c'hirri-nij a voe diorroet e dibenn ar brezel gant an embregerezh Marlin Rockwell hag anvet M1918. Homañ a voe diazez ar vindrailherez M1919 implijet diwezhatoc'h gant ar Stadoù-Unanet. Er bloavezhioù 1930 e voe kemmet ar plakennoù a gaved dindan kulasenn an M1917 evit reoù solutoc'h : M1917A1 e voe anvet ar stumm nevez produet adalek ar mare-se. An M1917 mod-kozh produet a-raok a voe treuzfurmet evit ar braz anezhe e M1917A1 gant arsanailh Rock Island[1].
Stummoù eus an M1917 a voe produet gant broioù all ha dindan anvioù disheñvel : FN30 gant an FN Herstal e Belgia, ksp m/14-29 ha ksp m/36 e Sveden, Ckm wz. 30 e Polonia hag M/29 e Norvegia.
An embregerezh stadunanat Tippman Arms Co. en deus gwerzhet er bloavezhioù 1990 kopiennoù eus an M1917, kambret e .22 Long Rifle, ha pourveziet gant gourizoù lien 100 kartouchenn[1].
Implij
[kemmañ | kemmañ ar vammenn]Ne erruas ar skouerennoù kentañ eus an M1917 nemet e 1918 war an talbenn, ha ne voent ket implijet puilh gant ar soudarded d'ar mare-se[4]. Er bloavezhioù 1920 e voe kopiet an arm gant armeurerien sinaat evit pourveziañ gouarnamant Beiyang a-enep ar Kuomintang[1]. An M1917, daoust d'he gwikefre yenaat dre zour bezañ diwar-lerc'h er bloavezhioù 1940 dija, a servijas da arme ar Stadoù-Unanet e-pad an Eil Brezel-bed, Brezel Korea[4], hag e deroù brezel Viêt Nam zoken.
-
Val Browning o tiskouez mont en-dro ar vindrailherez (Brezel-bed Kentañ) -
Soudarded norvegiat oc'h ober gant un M/29 a-enep kirri-nij da vare emgann Narvik e 1940 -
Un US Marine gant un M1917A1 e emgann Iwo-Jima (miz C'hwevrer pe miz Meurzh 1945) -
An M1917 e emgannoù brezel Korea
Er sevenadur
[kemmañ | kemmañ ar vammenn]- Er stirad skinwel The Pacific (2010) e weler ar vindrailherez implijet gant ar soudarded John Basilone, Robert Leckie, J.P. Morgan ha Manny Rodriguez e-kerzh emgann Guadalcanal[5].
Daveennoù
[kemmañ | kemmañ ar vammenn]- ↑ 1,0 1,1 1,2 1,3 ha1,4 (fr) CADIOU Yves L., Les Colt Volume 4, Fusils, carabines et mitrailleuses, Éditions du Portail, 1999, 120 p., ISBN 2-86551-042-5, pp. 64-66
- ↑ (fr) HOUSTON Rob, STROYAN Christine (renerezh), Armes à feu de légende, Larousse, 2019, p. 188
- ↑ (en) POPENKER Maxim, Browning M1917 M1919, Modern Firearms (lennet d'an 28/02/2025)
- ↑ 4,0 ha4,1 (fr) McNAB Chris, Armes à feu Encyclopédie visuelle, L'Imprévu, 2022, p. 248
- ↑ (en) Browning M1917, IMFDB (lennet d'an 28/02/2025)
| ||||||||||||||||||||||||||
.svg){kind=small}
.svg){kind=small}
