Brezel etre Italia ha Gres
| Rann eus | Balkans Campaign  |
|---|---|
| Lec'h | Albania, Gres |
| Deiziad kregiñ | 28 Her 1940 |
| Deiziad echuiñ | 23 Ebr 1941 |
| Perzhiad | Ugo Cavallero, Wilhelm List, Sebastiano Visconti Prasca, Alexandros Papagos |
Ar Brezel etre Italia ha Gres (gresianeg: Ελληνοϊταλικός Πόλεμος, Ellinoïtalikós Pólemos), anvet ivez brezel italian-gresian, Kampagn italian Gres, Aloubadeg italian Bro-C'hres, pe Brezel '40 e Gres, a oa bet stourmet etre Italia ha Bro C'hres eus an 28 a viz Here 1940 betek an 23 a viz Ebrel 1941. Ar brezel-se a oa bet kroget gant Kampagn ar Balkanioù e-kerzh an Eil Brezel-bed etre nerzhioù lu an Ahel hag ar Gevredidi, ha troet en Emgann Gres pa oa bet ar Saozon hag an Alamanted o kemer perzh.
D'an 10 a viz Even 1940, an Italia faskour he doa disklêriet ar brezel da Frañs ha d'ar Rouantelezh-Unanet. E miz Gwengolo 1940, an Italianed o devoa aloubet kreisteiz Bro-C'hall, Somaliland saoz hag Ejipt. An holl darvoudoù-se a oa bet heuliet gant ur c'hampagn e kazetennoù Italia a-enep Gres, a oa bet tamallet dezhi bezañ suj d'ar Saozon. Meur a atahin a oa bet betek distruj ar morreder skañv gresian Elli gant an Italianed d'ar 15 a viz Eost. D'an 28 a viz Here, Mussolini en doa embannet un ultimatom da vro C'hres o c'houlenn e vije lezet tiriadoù gresian gant Italia, ar pezh a voe nac'het raktal gant Kentañ ministr Gres, Ioannis Metaxas.
Aloubadeg Gres gant Italia a voe kroget gant rannarmeoù eus al Lu roueel italian adalek tiriad Albania aloubet gant Italia. Ar re-se a oa dafaret fall ha renet gant ofisierien diboell pe diskiant eus ar brezel. An disoc'h a oa bet fall evito : an Italianed a oa bet talet outo en un doare kreñv-souezhus gant Arme Gres ha deuet e oant a-benn da vont war-raok eus un nebeud kilometroù nemetken. Ouzhpenn-se, al lec'h tagañ choazet ganto, harzoù Albania gant Gres, a oa meneziek ha bouilhennek, ar pezh a oa bet ur skoilh ouzhpenn evit an dagerien. Gant mestroni ar Saozon war an oabl hag o harp gant dafar, an nerzhioù lu gresian a oa deuet a-benn da dalañ ouzh an aloubadeg italian e tiriad Gres e-kreiz miz Du. Goude-se e oa bet darn eus nerzhioù an arme gresian oc'h enep-argadiñ, betek rediañ an Italianed da gilañ betek harzoù Albania. An enep-argadenn c'hresian a oa bet en he barr gant kemeridigezh ode Klisura e miz Genver 1941, e-tro 12 kilometr a-dreñv harzoù Albania. Trec'het e oa bet an aloubadeg, hag ar c'holl gant an Italianed e-tal enep-argad ar C'hresianed e 1940 a zo bet anvet "kentañ emdenn nerzhioù an Ahel er brezel" gant Mark Mazower. Ar C'hresianed o doa "bamet an holl dud gant kalonegezh o difenn".