Bren Ten
| Bren Ten | |
|---|---|
 Ur bistolenn Bren Ten Special Forces | |
| Kinnig | |
| Bro |  Stadoù-Unanet Amerika |
| Doare | Pistolenn damaotomatek un-ober/daou-ober |
| Mont en-dro | Tennata dre argil berr |
| Munisionoù | .10 mm Auto .45 ACP |
| Produer | Dornaus & Dixon Enterprises, Inc. |
| Mare produiñ | 1983-1986 |
| Niver produet | War-dro 1.500 |
| Perzhioù teknikel | |
| Mas (hep kartouchenn) | 0,964 kg |
| Mas (karget) | 1,1 kg |
| Hirder | 222 mm |
| Hirder ar c'hanol | 127 mm |
| Endalc'h | Karger fiñv 8 pe 10 tenn (10 mm Auto) 8 tenn (.45 ACP) |
| Adstummoù | Gwelet ar pennad |
| Lezenn | |
| Rummad e Bro-C'hall | B |
Ar Bren Ten zo ur bistolenn damaotomatek un-ober ha daou-ober graet gant an embregerezh stadunanat Dornaus & Dixon Enterprises Inc. etre 1983 ha 1986. O frodu nemetañ e voe.
Istor
[kemmañ | kemmañ ar vammenn]E deroù ar bloavezhioù 1980 e oa pourveziet nerzhioù polis ar Stadoù-Unanet gant revolverioù uhel o c'halibr met hiroc'h da adkargañ, pe pistolennoù damaotomatek doare Wonder Nine, uhel endalc'h o c'harger met dezhe munisionoù 9 mm izeloc'h o galloud-herzel[1].
Savet e voe ar Bren Ten d'ar c'houlz-se gant Thomas Dornaus ha Michael Dixon, gant sikour Jeff Cooper. O fal e oa krouiñ evit ur bistolenn hag a vodje perzhioù mat an daou seurt arm, ha kinnig ur bistolenn modernoc'h evit ar Colt M1911 implijet en arme stadunanat[2]. Kemmañ a rejont ur CZ 75 evit ma c'hallje degemer ar munisionoù nevez 10 mm Auto ijinet gant Whit Collins ha produet gant an embregerezh svedat Norma. Anvet e voe Bren Ten abalamour da gêr broduiñ orin ar CZ 75 (Brno, e Tchekoslovakia, Bren)[1] ha d'e galibr (10 mm, Ten). Un arm e dir disvergl e oa, hag a rae gant ur sistem tennata dre argil berr heñvel ouzh hini ar Browning HP.
Kinniget e voe ar bistolenn en ur mod standart (karger 10 tenn) ha Compact (karger 8 tenn). Adstummoù anezhe a voe savet evel an SF (Special Forces, dezhañ ur c'hanol 4 meutad e-lec'h 5). Siwazh e talas an embregerezh ouzh meur a gudenn, evel kalite ar produiñ, tres ar c'hargerioù soñjet fall ha diaesterioù da respont d'ar rakurzhiadennoù armoù[1]. Ar Bren Ten a oa ivez un arm ponner, luziet e wikefre, hag a zegase kalz argil pa veze tennet gantañ[3].
Ne zeuas ket ar Bren Ten a-benn da gendrec'hiñ sevij surentez bras pe arme ebet. 1.500 skouerenn anezhi a oa bet produet hepken pa reas an embregerezh freuz-stal e 1986[3].
Er sevenadur
[kemmañ | kemmañ ar vammenn]Implijet e vez ur bistolenn Bren Ten gant Sonny Crockett (c'hoariet gant Don Johnson) er stirad polis Miami Vice (1984-1989)[4].
Daveennoù
[kemmañ | kemmañ ar vammenn]- 1 2 3 (en) McCOLLUM Ian, Bren Ten: The Most Tactical Pistol!, Forgotten Weapons, 30/09/2015 (lennet d'an 18/08/2025)
- ↑ (en) POPENKER Maxim, Bren Ten Pistol, Modern Firearms (lennet d'an 18/08/2025)
- 1 2 (en) SULLIVAN Ryan F., Bren Tens: History and Development, Rock Island Auction Company (lennet d'an 19/08/2025)
- ↑ (fr) Bren Ten, Deux flics à Miami.fr (lennet d'an 19/08/2025)
