Banniel Martinik

Eus Wikipedia
Sauter à la navigation Sauter à la recherche
Banniel ar vroadelourien
"Banniel an naeron", implijet nebeutoc'h-nebeutañ er vro

Martinik, ur vro dramor stag ouzh Bro-C'hall, n'he deus ket a vanniel ofisiel evit ar mare. N'eus nemet an triliv gall a zo ofisiel eno. Met daou vanniel all a vez implijet evit aroueziañ ar vro.

"Banniel an naeron" zo glas gant ur groaz wenn hag un naer wenn e pep karter. Bothrops lanceolatus, un naer hag a gaver en enezenn, eo a zo treset evel-se. Implijet e vez an arouez-se war lifreoù an archerien ha war lod eus savadurioù ofisiel ar vro.

Eus 1766 e vefe an arouez-se : en amzer-hont e veze implijet da bavilhon gant listri gall Martinik. Ne blij ket nemeur ar banniel-se d'an dud bremañ, rak gant al listri-se e veze kemeret perzh e kenwerzh ar sklaved[1]. E dibenn 2018 e oa bet dilezet gant an archerien[2].

Ur banniel all, ruz, gwer ha du, a vez implijet muioc'h-mui, abaoe eil hanterenn an XXvet kantved. Implijet e vez bremañ gant an holl luskadoù broadelour, war-bouez ar Mouvement Indépendantiste Martiniquais (MIM).

Implijet e vefe bet al livioù-se kerkent hag an emsavadegoù sklaved kentañ e 1665, e 1801 hag e 1870. Adimplijet e voent gant ar strolladoù dizalc'hour er bloavezhioù 1960 ha 1970. Talvezout a ra al liv ruz da aroueziañ ar vuhez hag ar sokialouriezh, al liv du da aroueziañ stourm ar re zu, hag al liv gwer, an douar hag ar beizanted. Bez' ez int ivez livioù hag a gaver e kalz bannieloù eus Afrika. Deuet eo ar banniel-se da vezañ arouez an darn vrasañ eus ar strolladoù dizalc'hour ha broadelour e Martinik bremañ. Implijet e vez en holl vanifestadegoù ha krog eur d'e lakaat ouzh an tiez-kêr ivez[3].

Melestradurezh Martinik, renet gant Alfred Marie-Jeanne eus ar MIM, en deus kinniget e vije treset ur banniel nevez da aroueziañ ar vro[4][5]. Met ar banniel choazet evel-se e 2019 n'eo ket bet degemeret gwall vat gant an holl dud[6].

Liamm diavaez[kemmañ | kemmañ ar vammenn]

Notennoù[kemmañ | kemmañ ar vammenn]