Astra 400
| Astra 400 | |
|---|---|
 Ur bistolenn Astra 400
| |
| Kinnig | |
| Broioù |  Euskal Herria Spagn
|
| Doare | Pistolenn damaotomatek, un-ober |
| Mont en-dro | Tennata dre argil, morzhol diabarzh |
| Munisionoù | 9 × 23 mm Largo 9 × 19 mm Parabellum (Astra 600) .32 ACP, .380 ACP (Astra 300) |
| Produerien | Astra y Unceta, Cía Uzin armoù Alginet Francisco Ascasso |
| Mare produiñ | 1921 - 1946 |
| Niver produet | 105.275 |
| Pouez ha muzulioù (hervez an adstummoù) | |
| Mas (hep kartouchenn) | 1,015 kg |
| Hirder | 150 mm |
| Hirder ar c'hanol | 224 mm |
| Perzhioù all | |
| Tizh mont e-maez ar boledoù | 335 m/s |
| Endalc'h | Karger fiñv 8 kartouchenn |
| Adstumm | Astra 600, Astra 300, Astra 400 Target |
| Lezenn | |
| Rummad e Bro-C'hall | B |
An Astra 400 zo ur bistolenn damaotomatek un-ober produet adalek 1921 gant an embregerezh euskarat Astra y Unceta, Cía (Gernika, Euskal Herria). Er memes bloaz e voe choazet evel arm-dorn standart gant arme Spagn, goude ur genstrivadeg, dindan an anv Pistola de 9 mm modelo 1921. Kalz a skouerennoù anezhi a voe produet betek 1946, ha servijout a reas da skouer e-pad brezel Spagn, en daou du. Lesanvet eo bet Puro ("segalenn") pe Astrona gant ar stourmerien, hag an dastumerien hiziv an deiz[1].
Deskrivadur
[kemmañ | kemmañ ar vammenn]An Astra 400 zo ur bistolenn un-ober, dezhañ ur morzhol diabarzh hag ur sistem tennata dre argil. kambret e 9 mm Largo, ur c'halibr hag a oa standart en arme spagnolat abaoe deroù an XXvet kantved dija. Ur arm ponner, solut ha fiziapl e oa, brudet evit gellet tennañ munisionoù 9 mm all evit e re orin hep ne vije ret kemmañ an arm, en o zouez an 9 mm Parabellum, an 9 mm Steyr pe an .380 ACP[2]. Ur c'harger 8 kartouchenn zo dezhi, met kargerioù 16 pe 20 tenn zo bet produet gant ar Republik da vare ar brezel diabarzh[3].
Adstummoù
[kemmañ | kemmañ ar vammenn]Diwar c'houlenn an arme alaman da vare an Eil Brezel-bed, a rae dija gant an Astra 400 met o doa bet kudennoù en ur implijout o munisionoù 9 mm Parabellum enne, Astra y Unceta a savas e 1943 an Astra 600, ur stumm savet a ratozh evit ar munision standart alaman. Ur stumm godell berroc'h, an Astra 300, kambret e .32 ACP ha .380 ACP, hag ijinet abretoc'h (1923), a voe gwerzhet d'an Alamaned ivez d'ar mare-se[3].
E 1945, bloaz a-raok e vije paouezet gant produiñ an arm, un nebeud skouerennoù eus ur stumm anvet Astra 400 Target a voe graet ivez, evit ar sportoù tennañ. Gwellaet e oa bet e gouch ha skañvaet pouez-loc'hañ e zraen[4].
Produiñ hag implij
[kemmañ | kemmañ ar vammenn]105.275 skouerenn eus an Astra 400 a voe produet en holl etre 1921 ha 1946. E-pad brezel Spagn e istimer e oa ur 25.000 bennak etre daouarn ar republikaned, ha tro 20.000 gant ar frankisted. D'ar poent-se e voe produet an Astra 400 e daou lec'h ouzhpenn gant ar republikaned : València (stumm merket R.E., República Española, war-dro 15.000 skouerenn), ha Tarrasa (Barcelona, stumm merket Francisco Ascaso izeloc'h e galite ha pourveziet d'an anarkourien katalan)[3]. An daou stumm zo heñvel ouzh an Astra 400 war-bouez o rizennoù e diabarzh o c'hanolioù.
Tennet e voe an arm eus ar servij ofisiel en arme spagnolat e 1946, ha paouez a reas e broduiñ er memes bloaz. Goude an Eil Brezel-bed e voe rediet Alamagn da adwerzhañ kalz skouerennoù eus an Astra 600 da vorlu Portugal, hag a re a chome gante a voe roet d'ar polis alaman dindan an anv Pistole 3. Arme Chile a reas gant an arm ivez[3].
Er sevenadur
[kemmañ | kemmañ ar vammenn]An Astra 400 a weler e meur a film, en o zouez Land and Freedom, sevenet gant Ken Loach e 1995. Gellet a raer c'hoari ganti e World of Guns: Guns Disassembly[5].
Levrlennadur
[kemmañ | kemmañ ar vammenn]- (fr) GUILLOU Luc, GOURIO Philippe, Les pistolets Astra, Pardès, 1991, ISBN 978-2867141089
Daveennoù
[kemmañ | kemmañ ar vammenn]- ↑ (es) PISTOLA ASTRA, MODELO 1921, CALIBRE 9 MM LARGO, Amonio (lennet d'ar 17/06/2025)
- ↑ (en) POPENKER Maxim, Astra mod. 400 and 600, Modern Firearms (lennet d'ar 16/06/2025)
- ↑ 3,0 3,1 3,2 ha3,3 (es) Pistola Astra 400. Historia de una leyenda., Armas de Fuego, 22/09/2012 (lennet d'ar 17/06/2025)
- ↑ (en) McCOLLUM Ian, From Service Sidearm to Match Gun: the Astra 400 Target Model, Forgotten Weapons, 26/08/2022 (lennet d'ar 16/06/2025)
- ↑ (en) Astra 300/400/600, IMFDB (lennet d'ar 15/06/2025)
