Argadenn war Gatalonia
| Rann eus | Brezel Spagn  |
|---|---|
| Stad | Spagn |
| Lec'h | Katalonia |
| Deiziad kregiñ | 23 Kzu 1938 |
| Deiziad echuiñ | 10 C'hwe 1939 |
An argadenn war Gatalonia (katalaneg: Ofensiva de Catalunya, spagnoleg: Ofensiva de Cataluña) a oa bet ul lodenn eus Brezel diabarzh Spagn. Al Lu broadelour en devoa kroget un argadenn d'an 23 a viz Kerzu 1938 hag aloubet prim Katalonia hag a oa diagent e dalc'h ar Republikaned, gant Barcelona (kêr-benn ar republik abaoe 1937).
Barcelona a oa bet aloubet d'ar 26 a viz Genver 1939. Ar gouarnamant republikan a oa tec'het da Vro-C'hall. Milieroù a dud a oa bet o tec'hout rak ar Vroadelourien ha treuzet ganto an harzoù er miz war-lerc'h. Lakaet e oant bet e kampoù-bac'h e Bro-C'hall. Franco en doa klozet an harzoù gant Bro-C'hall d'an 10 a viz C'hwevrer 1939.
Kenarroud
[kemmañ | kemmañ ar vammenn]Goude bezañ bet trec'het garv en emgann an Ebre, al Lu republikan a oa bet tizhet don ha ne c'hellas ket adsevel da dalañ ouzh nerzhioù Franco. Ar Republikaned a oa bet kollet ganto darn eus o unvezioù arroutet hag eus o dafar. Ouzhpenn-se, e miz Here 1938, ar gouarnamant republikan en doa asantet da dennañ ar youlidi eus an estrenvro. E-tal dezho, ar vroadelourien a oa bet o resevout dafar, munisionoù ha kirri-nij e-leizh a-berzh an Trede Reich.
Goude Emglev München, ar spi da gaout sikour a-berzh an demokratelezhioù kornôgel evit talañ ouzh nerzhioù an Ahel hag a harpe Franco a oa aet da get. An Trede Republik c'hall a oa bet o klozañ an harzoù e-kreiz miz Even 1938 ha skornañ arc'hant ar Republik spagnol e tiez-bank Bro-C'hall.