Aimo Lahti
| Reizh pe jener | paotr  |
|---|---|
| Bro ar geodedouriezh | Finland |
| Anv-bihan | Aimo |
| Anv-familh | Lahti |
| Deiziad ganedigezh | 28 Ebr 1896 |
| Lec'h ganedigezh | Viiala |
| Deiziad ar marv | 19 Ebr 1970 |
| Lec'h ar marv | Jyväskylä |
| Yezhoù komzet pe skrivet | finneg |
| Micher | Armerezh, milour, inventor |
| Oberenn heverk | Suomi KP/-31 |
| Prizioù resevet | Cross of Liberty, 4th Class, Knight of the Order of the White Rose of Finland, Memorial medal of the Winter War |
Aimo Lahti, ganet d’an 28 a viz Ebrel 1896 e Viiala (Finland) ha marvet d’an 19 a viz Ebrel 1970 e Jyväskylä, a oa un ofisour hag ijinour finlandat. Brudet eo evit an armoù-tan en doa savet etre ar bloavezhioù 1920 ha 1940, hag a voe implijet gant arme e vro e brezelioù ar mare-se.
Buhez
[kemmañ | kemmañ ar vammenn]Goude e studioù e labouras Lahti evit an hentoù-houarn e Finland. Ur wech echuet gant e amzer-servij en arme finlandat e 1921 tivizas chom da labourat enni evel armeurer, ha goude bezañ diskouezet e varregezhioù war an teknik e voe kaset da Servijoù an Dafar e Ministrerezh Diabarzh ar vro e 1925. Asambles gant ar c’habiten Saloranta e ijinas ur fuzuilh-vindrailher, al Lahti-Saloranta M/26, hag a voe implijet gant an arme adalek 1926[1].
E 1928 e voe anvet da c’hourseller en embregerezh-stad armoù VKT, hag e 1930 e voe lakaet e penn servij an armoù skañv eno. Er bloavezhioù 1930 e savas armoù a bouez e istor milourel Finland, en o zouez ar bistolenn-vindrailher Suomi KP/-31 (1931), ar bistolenn damaotomatek Lahti L-35 (1935) hag ar fuzuilh eneptank Lahti L-39 (1939). An armoù-mañ a voe implijet er Brezel Goañv a-enep an URSS (1939-1940) hag er Brezel Kendalc’h war-lerc’h, betek 1944[1].
An AAC (Allied Control Commission) a erruas er vro e miz Gwengolo 1944 evit kontrolliñ hag e oa doujet an harz-tan etre Finland hag an URSS, ha diwar-neuze e voe berzet da Lahti ijinañ armoù nevez. Bevañ a reas diwar ul leve major-jeneral roet gant an arme betek e varv e 1970.
Levrlennadur
[kemmañ | kemmañ ar vammenn]- (fi) VAAJAKALLIO Maire, Aimo Lahti: Asesuunnittelijana Suomessa, Jyväskylä, K.J. Gummerus, 1970, 12430/1970
Daveennoù
[kemmañ | kemmañ ar vammenn]- ↑ 1,0 ha 1,1 (en) Aimo Lahti, HLEBooks (lennet d'an 12/06/2025)
