Accuracy International Arctic Warfare

Accuracy International Arctic Warfare
Ur fuzuilh Arctic Warfare, en he stumm Psg 90 implijet gant arme Sveden.
Kinnig
Bro	Rouantelezh-Unanet
Doare	Fuzuilh-resisted
Mont en-dro	Tennata dre zorn, dre vorailh
Munisionoù	.308 Winchester / 7,62 × 51 mm NATO
Produer	Accuracy International
Mare produiñ	Abaoe 1982
Perzhioù teknikel (stumm kinniget d'ar SOCOM)
Mas (hep kartouchenn)	6,5 kg
Hirder	1 180 mm
Hirder ar c'hanol	660 mm
Hed-tenn efedus	800 m
Tizh ar boledoù V0	850 m/s
Endalc'h	Karger fiñv 10 kartouchenn
Lezenn
Rummad e Bro-C'hall	C

An Arctic Warfare zo ur rummad fuzuilhoù-resisted savet gant an embregerezh saoz Accuracy International e deroù ar bloavezhioù 1980. Implijet e vez er British Army ha gant armeoù all er bed, dindan anvioù disheñvel.

Deskrivadur

Awenet eo ar fuzuilh gant an armoù-skoaz implijet er sportoù tennañ. Savet eo tro-dro d'ur framm aluminiom, savet warnañ elfennoù e danvezioù plastek hag ur c'hanol ponner war-neuñv. E gulasenn-vorailh zo soñjet evit ma n'en defe ket an tenner da sevel e benn pa adkarg. Kambret eo evit kartouchennoù 7,62 × 51 mm, pourveziet gant ur c'harger 5 tenn. Ar stumm breizhveuriat a vez savet ul lunedenn Schmidt & Bender warni, dezhi ur c'hreskadur ×6.

Istor hag implij

Savet e voe an Artic Warfare goude ur galv gant ar British Army e 1982 evit kaout fuzuilhoù-resisted nevez e lec'h an L42A1, a oa diazezet war al Lee-Enfield. Diazezerien an embregerezh Accuracy International a gemeras perzh er genstrivadeg gant ur fuzuilh-vorailh awenet gant armoù ar sportoù tennañ. An arm, anvet Precision Marksman da gentañ, a voe dibabet gant an arme dindan an anv L96.

Ar G22 hag he reduer-son, stumm an Arctic Warfare implijet gant arme Alamagn.

E miz Here 1988 e voe prenet ur stumm eus an arm gant arme Sveden, a implijas anezhañ dindan an anv Psg 90 (evit Prickskyttegevär, «fuzuilh sniper»). Gwellaet e oa bet evit talañ ouzh endroioù yen norzh Europa, alese he anv Arctic Warfare evit ar marc'had sivil. Ar British Army a zegemeras ar stumm-mañ ivez, dindan an anv L96A1, evel arme Aostralia, a anvas anezhi SR98.

Stummoù all zo bet deveret anezhi :

• AWF (Arctic Warfare Folding), gant ul lamm blegus (L118AS / Psg90B en armeoù) ;
• AWP (Arctic Warfare Police), berroc'h he c'hanol ;
• AWS (Arctic Warfare Suppressed) : soñjet evit tennañ munisionoù subsonek ;
• AWM (Arctic Warfare Magnum), kambret evit ar c'halibroù .300 Winchester Magnum pe .338 Lapua Magnum ;
• AWM50 : stumm kambret e .50 BMG, implijet e armeoù Breizh-Veur hag Aostralia, hag gant ar Bundeswehr (G22).

Levrlennadur

• (en) Steve HOUGHTON, The Green Meanie. L96A1, Swift an Bold Publishing, 2021, 280 p., ISBN 978-1527274617