APS (pistolenn)
| Pistolenn Aotomatek Stetchkin | |
|---|---|
 Ur bistolenn APS gant he lamm | |
| Kinnig | |
| Bro |  URSS |
| Doare | Pistolenn damaotomatek / aotomatek |
| Mont en-dro | Tennata dre argil simpl |
| Munision | 9 × 18 mm Makarov |
| Mare produiñ | 1951-1958 (APS) 1972-1973 (adstumm APB) |
| Mare implij | Abaoe 1951 |
| Meneger GRAU | 56-A-126 |
| Perzhioù teknikel | |
| Mas (hep kartouchenn) | 1,22 kg |
| Hirder | 225 mm |
| Hirder ar c'hanol | 140 mm |
| Hed-tenn efedus | 50 m |
| Hed-tenn d'ar muiañ | 200 m |
| Lusk-tennañ | 750 m |
| Tizh ar boledoù V0 | 340 m/s |
| Adtsumm | APB |
| Endalc'h | Karger fiñv 20 kartouchenn |
| Lezenn | |
| Rummad e Bro-C'hall | A |
Ar bistolenn aotomatek Stetchkin, anvet ivez APS (rusianeg : АПС, evit Автоматический Пистолет Стечкина, "Avtomatitcheskiy Pistolet Stetchkina"), zo ur bistolenn damaotomatek hag aotomatek bet ijinet gant ar rusian Igor Stetchkin ha produet adalek 1951. Servijout a reas en arme soviedel hag e unvezioù ispisial betek brezel Afghanistan dreist-holl.
Istor
[kemmañ | kemmañ ar vammenn]
Goude an Eil Brezel-bed, an arme soviedel e voe an hini gentañ o reneveziñ he armoù hiniennel penn-da-benn. Fellout a rae dezhi reiñ d'he soudarded un arm-dorn bihan a-walc'h evit chom hep kemer re a blas e-pad o c'hefridioù, met galloudus a-walc'h evit pourveziañ ur galloud-tan uhel memestra. Igor Stetchkin, un ijiner e uzin armoù Toula, a grogas da labourat e kreiz 1948 war ar raktres, ha kentaptromoù a ginnigas e 1949. E bistolenn he doa ur wikefre dennata dre argil simpl, ar pezh a oa aesoc'h da broduiñ evit ar re gant ur sistem dre argil berr ar c'hanol. Pourveziet e oa gant ur c'harger 20 kartouchenn 9 × 18 mm Makarov, ar memes re implijet en arm a oa o vezañ savet gant e benn meur Nikolay Makarov. Pistolenn Stetchkin a c'halle tennañ e mod daomaotomatek pe aotomatek, gant ul lusk 750 tenn/mn. Ul lamm a c'halle bezañ staget outi, evel war ar Mauser C96, evit kontrolliñ anezhi aesoc'h e-pad an tennadegoù[1][2].
Asantet e voe an arm er servij e 1951. Pourveziet e voe da soudarded ar c'hanolierezh, d'an ekipajoù tankoù, da ofiserien kaset war al linennoù kentañ[2], ha d'ar skipailhoù troadeien karget da dennañ gant banneroù-greunadennoù RPG-2. Buan e voe gwelet e oa re vras an APS hag he lamm war ar pemdez. Ouzhpenn e oa diaes da vestroniañ pa denne a-dennadegoù[3], ha re izel e oa galloud he c'hartouchenn 9 mm Makarov evit bezañ implijet evel arm pennañ war an dachenn emgann. Er bloavezhioù 1950 e kreskas galloud produiñ an industriezh soviedel, ha divizet e voe reiñ un arm-skoaz galloudus - an AK-47 pe ur stumm deveret anezhi - da bep soudard war an dachenn.
.jpg)
Paouezet e voe da broduiñ an APS e 1958 neuze. Un adstumm gant ur reduer-son hag ul lamm disheñvel, anvet APB, a voe savet evit ar Spetsnaz e 1972-1973[4]. Testeniekaet eo implij an APS e-pad brezel Afghanistan, etre 1979 ha 1989. Er c'hontrol d'an armoù all produet gant Soviediz, an APS n'eo ket bet ezporzhiet kalz e broioù tost ouzh an URSS[1].
Levrlennadur
[kemmañ | kemmañ ar vammenn]- (en) THOMPSON Leroy, Soviet Pistols: Tokarev, Makarov, Stechkin and others, Osprey Publishing, 2022, 80 p., ISBN 978-1472853486
Daveennoù
[kemmañ | kemmañ ar vammenn]- 1 2 (en) Vlad BESEDOSKYY, APS Stechkin automatic pistol - Soviet pocket submachine gun, Safar Publishing, 20/11/2023 (lennet d'an 28/06/2026)
- 1 2 (en) POPENKER Maxim, Stechkin APS, Modern Firearms (lennet d'an 28/06/2026)
- ↑ (fr) HOUSTON Rob, STROYAN Christine (renerezh), Armes à feu de légende, Larousse, 2019, ISBN 978-2035979650, p. 273
- ↑ (en) The APS Stechkin: From Sidearm To Spetsnaz, The FirearmBlog, 28/10/2015 (lennet d'an 28/06/2026)
