Yann

Sellit ouzh ar ger Yann er
wikeriadur, ar geriadur frank.

Yann zo un anv-badez brezhonek a zo deuet eus ar Bibl, hag a vez roet d'ar baotred.

A-wechoù e vez klevet anv eus ar stummoù Yanna, pe Yannez, evit ar merc'hed, met ar re-se a seblant ijinet nevez zo. Graet e vez gant Janed kentoc'h, un anv deuet eus ar galleg.

Gerdarzh

Dont a ra eus an hebreeg יוֹחָנָן (Jōħānān) a dalv kement ha "Doue a zo madelezhus"), deuet da vezañ Ἰωάννης (Iōánnēs) e gregach, ha Johannes e latin.

Un anv "boutin"

Un anv roet stank e oa e Breizh, hag en holl vroioù kristen, dre ma oa anv daou sant eus penn kentañ istor ar gristeniezh. Krog eo e vrud da goazhañ abaoe ur pennad avat.

Adstummoù

• Yannig e brezhoneg, skrivet Yannick e galleg. Er bloavezhioù 1950-1960, pa ne veze desket tost tamm brezhoneg ebet er skol, e oa ar c'hiz da skrivañ ick en anvioù-badez evel Annick, Jannick, Loick, Pierrick, Yannick, Yvonnick.

E yezhoù all

Kavout a reer an anv Yann, pe e gevatal, en holl yezhoù Europa ha dre ar bed, abalamour da emled ar relijion kristen.

• Yezhoù keltiek
  • Jowan e kerneveureg
  • Eóin pe Seán en iwerzhoneg
    • anv ar skosad Sean Connery
  • Eòin pe Seathan e gouezeleg Skos
  • Siôn pe Sion hag Ioan hag Ieuan, hag Iwan e kembraeg

• Yezhoù romanek
  • Jean (skrivet Jehan, gwechall) e galleg,
    • anv daou roue gall
    • anv meur a sant gall, Jean Eudes, Jean-Baptiste de la Salle, ha re all
    • Jeanne eo ar furm wregel
  • Giovanni (pe Gianni dre verrdro), en italianeg,
    • anv 23 fab, hep kontañ 2 a voe Giovanni Paolo
    • anv ar sant Giovanni Melchior Bosco Ochienna, anavezet evel Don Bosco
    • Giovanna pe Gianna eo ar furm wregel
  • João e portugaleg
  • Joan, e katalaneg, a zo ivez furm wregel an anv e saozneg,
  • Juan e spagnoleg
    • Juan de la Cruz, pe Yann ar Groaz, barzh spagnolek ha sant
    • Juana eo ar stumm wregel
  • Xoán pe Xan, e galizeg

• Yezhoù germanek
  • John e saozneg, Johnny ha Jacky ar stummoù bihanaat
    • anv ar roue saoz brudet, John Lackland, anvet ivez Yann Dizouar e brezhoneg,
    • Joan, Joanna, Jane eo ar furmoù gwregel
  • Johannes pe Johann, en alamaneg (ha yezhoù germanek arall evel an nederlandeg pe an daneg), ha Hans pe Jan ar stummoù bihanaat
    • Johannes Brahms, sonaozour
  • Jens, Johan, Jan, Hans e daneg
  • Jón, an anv-badez poblekañ en Enez ar Skorn

• Yezhoù slavek
  • Ivan, e ruseg ha yezhoù slavek arall
  • Jan, Iwan, Janek e poloneg

• Yezhoù semitek
  • يوحنا (yūħanna) en arabeg
  • Ġwann, e malteg
  • יוחנן (Yūkhanān), en hebraeg

• Yezhoù baltek
  • Jonas , e lituaneg

• Yezhoù all
  • Jon (distaget Yôn), hag Iban, pe Manex, pe Xan, en euskareg
  • Ίώαννης e henc'hresianeg ha Γιάννης e gresianeg a-vremañ

Tud

E-touez an dud anvet Yann

• 2 a oa sent, gwelout Sant Yann
• 23 Yann a voe pibien, gwelout Yann (pab)
• 8 Yann a voe impalaerien ar Reter, gwelout Yann (impalaer)
• 5 Yann a voe duged Breizh, gwelout Yann (dug Breizh)
• 2 Yann a voe roueed gall, gwelout Yann (roue Bro-C'hall)
• ur Yann a voe roue Bro-Saoz, Yann Dizouar
• 2 Yann a voe rouaned Aragon
• ur roue eus Bohemia, Yann an Dall (1296-1346) anavezet ivez evel Yann Luksembourg
• 6 Yann a voe roueed Portugal, gwelout João
• 3 Yann a voe roueed Pologn, gwelout Yann (roue Pologn)

Sent kristen

Daou sant kentañ

Anaout a reer da gentañ:

• Yann ar Badezour , an diouganer a vadezas Jezuz, deuet an anv kristen Yann-Vadezour, hag an anv-badez, diwar e lesanv, lidet d'ar 24 a viz Mezheven pe d'an 29 a viz Eost.

• Yann an Abostol, hag an Avielour, a skrivas ar pevare aviel ha levr an Diskuliadur, lidet d'ar 27 a viz Kerzu pe d'an 8 a viz Mae

Sent all

Sent all zo bet avat:

• Yann Diarc'hen (1280-1349); ganet e Sant-Nouga, e Leon.
• Yann an Aluzener, lidet d'an 23 a viz Genver, pe a viz Du e reter Europa
• Yann Bosco, sant italian
• Yann Brébeuf
• Yann Cassien
• Yann Capistran
• Yann Krizostom
• Yann Klimak
• Yann ar Groaz, ur sant spagnol a oa Juan de Yepes e wir anv,
• Yann Damasken
• Yann Doue
• Yann Efeza
• Yann Eudes
• Yann de Lalande
• Yann Matha
• Yann Nepomuken
• Yann Sant-Tomas

Tud all

Breizh

• Yann Derrien, saver sonioù
• Yann Landevenneg, abad Landevenneg, hag anv ur pezh gant Yann-Vari Perrot,
• Yann Vari Joanno, beleg katolik ha skrivagner brezhonek
• Yann-Vari Perrot, beleg katolik ha skrivagner brezhonek
• Yann Fouéré, broadelour
• Yann Goulet, broadelour
• Yann Jouet, broadelour
• Yann Gerven, skrivagner ha romantour brezhonek
• Tri Yann, sonerien

 Bro-C'hall

• Yann Arthus-Bertrand, luc'hskeudenner pinvidik
• Yann Lachuer, melldroader a orin breizhat
• Yann Queffelec, skrivagner a orin breizhat
• Yann Tiersen, soner
• Yann Wehrling, politikour eus Elzas

Kanada

• Yann Martel, skrivagner

Gouel Yann

Klotañ a ra Gouel Yann, a zegouezh d'ar 24 a viz Mezheven, gant deroù an hañv.

Yanned

• E brezhoneg e vez implijet Yann evel anv n'eus forzh piv (Fañch a-wechoù), pe n'eus forzh pe baotr (Soaz alies evit ar merc'hed, Marijan a-wechoù):
  • Ur Yann bennak : un den, n'ouzer ket piv, pe ne vern piv;
  • Yann Vrezhonek pe Yann Vrezhoneger a vez lavaret ivez pa gomzer eus an holl vrezhonegerien
  • Yann Frank-e-c'houzoug: lesanv al lonkerien
  • Yann Gaezh, anv an holl beorien
    • en deus ur vuoc'h, hag e lavarer diwar-benn ul loen: Honnezh zo evel buoc'h Yann gaezh, Ha n'he doa na leue na laezh,
    • en deus ur c'hi, hag a lavarer diwar e benn: Ki Yann Gaezh zo marvet gant an naon : n'eus deuet den da reiñ dezhañ da zebriñ.
    • a vo lavaret a-wechoù gant un den o komz diwar e benn e-unan.
  • Yann Gouer eo anv an holl gouerien
  • Yann Lonk, al lonkerien
  • Yann ar Mil Micher, a rae mil micher ha ne ouie hini ebet, hervez ar vrud. Lavaret e vez ivez Daniel ar Mil Micher hervez levrioù Jules Gros.
  • Yann Saoz: ar Saozon
  • Yann Soudard: ar soudarded
  • Yann Douz, un anv a vez graet diwar-benn an dud touzet, dreist-holl en amzer ma tremene an holl yaouankizoù dre an arme,
    • Pa vez aet kozh Yann Douz e vez graet Yann Voal anezhañ.
  • Yann Vartolod: ar vartoloded
  • Yann Voal : ar pennoù moal
  • Yann Vourdoù: lesanv ar farserien
  • Yann Vous: ar vugale, ar baotred.

Yann ar Yod

Diwar skouer ar galleg marteze eo deuet an anv Yann (ha Yannig dreist-holl) da vezañ arouez ar sotoni.

• Yann al Leue, Yann ar Yod,
• Yann Seitek a laka triwec’h d’ober naontek, eo patrom an dud n'int ket fin
• Yann-Yann, Yann div wech Yann, gwelout Jean-Jean.

Yannig

Ur Yannig n'eo ket un den fin, evel ma weler e div ganaouenn:

• Me eo ar paour-kaezh Yannig, SBI
• Me eo ar sotañ Yannig ’zo bet biskoazh er bed. Kanaouenn.

Pennadoù kar

• Giovanni
• Jean
• Juan
• John
• Jan
• Janed
• Joan
• João