Titicaca
Diwar Wikipedia, an holloueziadur digor
| Lenn Titicaca | |
|---|---|
 |
|
| Bro(ioù) : | Perou, Bolivia |
| Rannvro : | Suamerika |
| Gorread : | 8.562 km² |
| Donder brasañ : | 281 m |
| Hed ar ribloù : | 1125 km |
| Adstêr(ioù): | ouzhpenn 20 |
| Diazad doureier : | 58.000 km² |
| Kêrioù pennañ war ribloù al lenn : | Copacabana, Puno |
Al lenn Titicaca eo al lenn uhelañ er bed a vez bageet warni. Emañ 3 812 metr a-us live ar mor, er menezioù Andoù, war an harzoù etre Perou ha Bolivia. Etre 140 ha 180 metr eo e zonder well-wazh ha 281 metr eo e zonder brasañ. War-dro 190 km eo e hed ha 80 km e led. Emañ lodenn gornôk al lenn e rannvro Puno e Perou, hag emañ al lodenn reter e departamant La Paz e Bolivia.
Ouzhpenn 25 stêr en em daol el lenn. Enni ez eus 41 enezenn ha war lod anezho ez eus tud o chom. Touristed a ya da weladenniñ an inizi-se, diouzh porzh Puno e Perou dreist-holl. Kalz a dud a ya evel-se d’an inizi Uros, inizi artisifiel, graet gant korzennoù raoskl war-neuñv. Inizi all zo ivez, evel Amantaní , Taquile, brudet abalamour d’ar stammennoù graet gant an Indianed zo o chom enni, pe Isla del Sol, an enezenn vrasañ, e Bolivia.
D’ar stêr Desaguadero, a ya a-dreuz Bolívia betek al lenn Poopó, ez a kuit darn eus dourioù al lenn Titicaca.
Lodenn c’hevred al lenn zo damzispartiet diouzh ar peurrest ha graet e vez anezhi Lago Huinaymarca, e spagnoleg, e Bolivia, tra ma vez graet Lago Chucuito eus al lodenn vrasañ. E Perou e vez graet anezho Lago Pequeño (Lenn Vihan) ha Lago Grande (Lenn Vras). En aymara hag e quechua e reer gant an anv Titiqaqa. Ne ouzer ket a belec’h e teu an anv-se e gwirionez.
