Paol Aorelian

den
Reizh pe jener	paotr
Bro ar geodedouriezh	Breizh
Anv-bihan	Paul
Anv-familh	Aureliano
Deiziad ganedigezh	492
Lec'h ganedigezh	Rouantelezh Morgannwg
Deiziad ar marv	573
Lec'h ar marv	Enez-Vaz
Yezhoù komzet pe skrivet	galleg
Micher	beleg
Karg	Eskob
Studier	Laouenan
Bet studier da	Sant Ildud
Stad ar c'hanonizasion	sant, sant katolik
Gouel	12 Meurzh, 10 a viz Here

Paol Aorelian, pe Paulinus Aurelianus (e latin), Paol a Leon a wechoùigoù, zo ur sant brezhon eus ar VIvet kantved, deuet eus al lodenn eus Enez Vreizh a zo kreisteiz Kembre hiziv. Gantañ e voe savet eskopti Leon ha marteze Kastell-Paol (Bro-Leon) hervez an hengoun. Bez ez eo unan eus ar seizh eskob , pe Sent Breizh, o deus diazezet seizh eus nav eskopti kozh Breizh.
D'an 12 a viz Meurzh e vez lidet sant Paol Aorelian .

E anv[kemmañ | kemmañ ar vammenn]

Paol eo e anv e brezhoneg, Paulinus e latin. Gant an anv Aorelian e c'haller soñjal e oa kar d'ar brezelour Ambrosius Aurelianus a oa e penn Brezhoned Enez Vreizh a-enep ar Saozon etre 470 ha 485. Kadarnaet eo gant se ar soñj e oa aozet an divroadeg da Arvorig gant priñsed ha beleien adalek ar VIvet kantved evit tec'hel rak lanv aloubadeg ar Saozon.

E vuhez, etre istor ha mojenn[kemmañ | kemmañ ar vammenn]

Anavezet eo e vuhez dre ar buhezskrid latin savet gant ar manac'h brezhon Wrmonoc en abati Landevenneg en IXvet kantved. Met an dornskrid koshañ deuet betek ennomp zo eus an Xvet kantved.

E Kembre[kemmañ | kemmañ ar vammenn]

Ganet e oa Paol e Bro-Gembre war-dro ar bloaz 480, e Penychen (a zo Boverton hiziv) en Morgannwg met marteze ez eus kemmesk gant ur roue Paul Penychen. E dad a oa ur marc'heg, anvet Porphino, pe Perphirius/Porphyrius ("gwisket e moug"), hag a felle dezhañ ez afe da vrezelour eveltañ. Nav breur ha teir c'hoar en devoa. Anaout a reer anv daou vreur, Podol ha Natol, ha hini ur c'hoar, Juthwara, Sidwell (Sitofolla) a voe abadez, ha Wulvela.

Peogwir e enebe ar mab ouzh e dad e voe lakaet, d'e nav bloaz, e manati ar manac'h Ildud, en enez Pyrus, a zo Caldey e saozneg.

Studiañ a reas asambles gant Gweltaz ha Samzun, ha Dewi, e skol sant Iltud e Llanilltud Fawr (Bro-Gembre). Goude-se ez eas da vanac'h war douaroù e dad. Dont a reas diskibien d'e gaout.

E Kerne-Veur[kemmañ | kemmañ ar vammenn]

War-dro 520 (pe abretoc'h) ez eas da g-Kernev-Veur, da gaout ar roue Konomor (marteze ar roue Marc'h e mojenn Tristan hag Izold) hag a rene e Domnonea, da lavarout eo en daou du da Vor Breizh. E Kernev-Veur, e krouas parrez Pawl, hag alese ez eas da Arvorig.

E Breizh[kemmañ | kemmañ ar vammenn]

Hervez ar richenn e tilestras en Enez Eusa ha goude-se e teuas d'an douar- bras. Kont Leon, Withur, a roas dezhañ un aviel hag ur c'hloc'h, ar c'hastell roman hag Enez-Vaz. Paol a savas daou vanati, an eil war an enez hag egile er C'hastell. Evit sentiñ ouzh Childebert eo e teuas da vezañ eskob hag ar c'hastell a zeuas da vezañ an eskopti. Biskoazh n'eus ket bet kavet roudoù eus ar c'hastell-se.