Pêr Denez
| Pêr Denez | |
|---|---|
 Per Denez e 1972 |
|
| Anv ofisiel | Pierre Denis |
| Anv pluenn | Per Denez |
| Obererezh | Romantour, daneveller, barzh, yezhoniour, troer |
| Ganedigezh | D'an 3 a viz C'hwevrer 1921, e Roazhon,  Breizh |
| Marvidigezh | D'an 30 a viz Gouere 2011, e Rovelieg |
| Yezh skrivañ | Brezhoneg, galleg |
kemmañ  |
|
Per Denez, evel ma skrive e-unan, pe Pêr Denez, Pierre Denis e anv ofisiel, a zo bet ganet d'an 3 a viz C'hwevrer 1921 e Roazhon, marvet d'an 30 a viz Gouere 2011 e Rovelieg, anavezet eo evit e labour skrivagner, geriadurouriezh hag emsaver dreist-holl.
Taolenn |
E red-micher [kemmañ]
Kelenner war ar saozneg eo bet da gentañ, e Douarnenez. Bernard Le Nail a skriv e oa bet harluet da Périgueux e deroù e red-micher abalamour d'e vennozhioù a-du gant an emsav[1]. Kelennet en deus brezhoneg goude-se e skol-veur Breizh-Uhel (Roazhon 2), e-lec'h ma chomas e-pad 21 bloaz. E 1981, a-drugarez dezhañ, e oa krouet an aotreegezh war ar brezhoneg, diwar ziviz prezidant nevez ar Republik c'hall, François Mitterrand e-unan.
Krouet en deus an ti-embann Preder gant Guy Etienne, e 1958.
Prezidant eo bet e Kuzul skiantel ha kas en-dro Skol-Uhel ar Vro (1984-200?). Prezidant Kuzul ar Brezhoneg eo bet ivez. Bez' e oa prezidant bodad skoazell listenn an UDB ivez, e dilennadegoù rannvro 1998. E miz Meurzh 1999, e ro anvioù Yann-Kel Kernalegenn ha Kristian ar Bihan, emsaverien eus an FLB d'ar gelaouenn Armor Magazine a-benn dilenn ar Breton en deus graet ar muiañ evit Breizh e-doug an tregont vloaz tremenet.
Deskiñ ar yezh [kemmañ]
Talvoudus eo bet e hentenn brezhoneg (troet e saozneg, en alamaneg, e katalaneg, e kembraeg hag en esperanteg) d'ur mare ma ne oa nemet dornlevrioù kozh diamzeret da studiañ ar yezh. Un toullad mat a dud zo bet o teskiñ brezhoneg ganti. Daoust da se n'eo ket difazi (evel re all moarvat), hag un toullad fazioù zo bet renablet gant Jean-Claude Miossec. Dilezet eo bet tamm-ha-tamm, evel ma c'hoarvez d'an holl levrioù-skol, hag implijet e vez hentennoù nevesoc'h, pezh zo sin a yec'hed, hag a vo da nevesaat ivez.
Sevenadur Breizh [kemmañ]
Meur a gelaouenn zo bet savet gant Pêr Denez, Kened, Ar Vro e 1959, ha renet en deus ar gelaouenn Hor Yezh ha savet an ti-embann Mouladurioù Hor Yezh. Graet eo bet Doktor honoris causa eus Skol-veur vroadel Iwerzhon ivez.
Lukian Kergoat en doa kemeret e lec'h e penn Rann geltiek skol-veur Roazhon 2 e 1990. Emañ e vab Gwendal Denez o labourat er rann-se hiziv an deiz.
Medalennoù [kemmañ]
Dilennet eo bet Breizhad ar bloaz gant skipailh Armor magazine e 1981. Graet eo bet marc'heg Kroaz San Jordi, e Katalonia. Resevet en deus ivez tro-c'houzoug Urzh an Erminig e 1989 Naoned ; priz a vez roet bep bloaz da bevar den a vez o labourat evit kreskiñ sked Breizh.
Oberennoù [kemmañ]
- Korf an den 1941. dornlevrig korfadurezh e brezhoneg
- Douarouriezh, Preder, 1961, gant G.B. Kerverzioù
- Tonkad 61, Preder, 1961, gant A. Thoravel, Gw. Ar Menn, Gourlann, Abanna, Bodmael, Y. Olier, A. Even, A. Heussaff, ha Rikagos
- Al loened, Preder, 1965
- Kentelioù brezhoneg, Al Liamm, 1971
- Etude structurale d'un parler breton: Douarnenez, tezenn (3 levrenn), skol-veur Roazhon, 1977
- Glas evel daoulagad c'hlas na oant ket ma re, Al Liamm, 1979
- Diougan Gwenc'hlan, Al Liamm, 1979
- Geriadur brezhoneg Douarnenez, 4 levrenn, Mouladurioù Hor Yezh, 1980, 1981, 1985
- Hiroc'h eo an amzer eget ar vuhez, Mouladurioù Hor Yezh, 1981
- Evit an eil gwech, Mouladurioù Hor Yezh, 1982
- Mont war-raok gant ar brezhoneg, Mouladurioù Hor Yezh, 1987
- Eus un amzer 'zo bet, Mouladurioù Hor Yezh, 1992
- En tu all d'an douar ha d'an neñv, Mouladurioù Hor Yezh, 1993
- Kenavo ar c'hentañ er joaioù, Mouladurioù Hor Yezh, 1994
- An amzer a ra e dro, Mouladurioù Hor Yezh, 1995
- Yezh ha bro, Mouladurioù Hor Yezh, 1998.
- Da rouz an noz, Mouladurioù Hor Yezh, 1996
- P'emañ ar mor o regel..., dastumad barzhonegoù, Skrid, Mouladurioù Hor Yezh, 2001
- Warc'hoazh e tarzho c'hoazh an deiz, danevelloù, Mouladurioù Hor Yezh, 2006
- E peoc'h an nevez-hañv, Mouladurioù Hor Yezh, 2007
- Kenavo ar wech all, Moulladurioù Hor Yezh, 2008
A bep seurt [kemmañ]
- Bretagne et peuples d'Europe, Hor Yezh, Klask, 1999 (dastumad pennadoù savet en e enor)
Notennoù [kemmañ]
- ↑ Le Dictionnaire des romanciers de Bretagne
