Gwilherm Berthou-Kerverzhiou

Eus Wikipedia
Mont da : merdeiñ, klask
Gwilherm Berthou-Kerverzhioù
Anv ofisiel Guillaume Berthou
Anv pluenn G.B. Kerverzhioù
Obererezh Barzh, skrivagner
Ganedigezh d'an 10 a viz Mae 1908
Pempoull
Marv d'an 13 a viz Meurzh 1951
Roazhon
Yezh skrivañ Brezhoneg
Oberennoù pennañ
Barzhonegoù, Levr an amprevaned, Llena Davies

Gwilherm vBertoù, hag a sine dre vras G.B. Kerverzhioù (ha "Kerverziou" a-raok 1941), a zo ur skrivagner brezhoneg ganet e Pempoull d'an 10 a viz Mae 1908 ha marvet e Roazhon d'an 13 a viz Meurzh 1951.

Buhez[kemmañ]

Mab e oa d'ur c'habiten a vor eus Pempoull. Mont a reas d'ar skol-vihan e Pempoull, d'al lise e Sant-Brieg. Tremen a reas e vachelouriezh war ar skiantoù hag al lizhiri e 1925 ha 1926. Mont a reas neuze d'ar skol-veur e Roazhon, ha dont a reas da vezañ ijinour-strilhour e 1929. Er memes bloaz e voe ijinour e Goueled-Antr (Bro-Naoned). Goude-se e voe o chom e Sanch Amàs er Provañs, hag e Brest (er Vilin Wenn), e 1931. Heskinet e voe gant ar polis e 1932 abalamour da darzhadenn Roazhon (pa oa bet lakaet da bulluc'hañ an delwenn ma veze diskouezet Breizh daoulinet dirak ar Frañs). Tamallet e voe dezhañ bezañ kenlabouret da sevel ar poultr. War-lerc'h ez eas da Varselha, ha distreiñ da Landreger e 1935.

Adalek 1939 e voe kelenner war ar strilhouriezh hag an naturoniezh e skolaj Itron Varia ar Wir Sikour e Brest. Sekretour Gwalarn e voe neuze, koulz ha merour Arvor, ha skrivagner e-barzh L'Heure Bretonne (kronikenn "ar yezh hag ar vro". Goude ar brezel e voe teñzorer Kad, ha rener ha pennskrivagner Ogam. Skrivet en deus pennadoù ivez e-barzh Galv, Studi hag Ober, hag al Liamm. Mervel a reas e 1951, d'an oad a 43 bloaz, klañvet-fall ma oa. Barzh e voe Gwilherm vBertoù dreist-holl, met un nebeud danevelloù a zo anavezet ivez, en o zouez an hini gentañ el lennegezh vrezhonek ma'z eus anv eus darempred rev (Llena Davies). Lavaret e vez gant kalz ez eo luziet-tre e varzhonegoù, levezonet gant an hengeltieg hag ar skiantoù.