Erv (douaroniezh)
Un erv zo ur bern traezh pe vein hag en em astenn er mor, war an aodoù. Stummet e vez gant traezh pe vili degaset gant ar mor hag a ya da zastum en ur riblennad, gant ur penn anezhi stag ouzh an aod hag ar penn all o valirañ en dour.
A-wechoù e vez an irvi-se a-stur gant an aod, mui pe vui, gant ul ledennad dour anvet loc'h pe morlenn a-dreñv dezho. Gallout a ra an erv en em astenn eus ur beg bennak tre betek ur beg all ha sparlet e vez dour al loc'h, dispartiet penn-da-benn diouzh ar mor. Lod eus an irvi avat ned eont ket tre eus an eil beg-douar d’egile ha neuze e vez un toull, ar gouzoug, etre an erv hag ar beg-douar, ma c'hall an dour tremen drezañ pa vez tre ha lanv.
A-wechoù e c'hall an irvi stagañ un enezenn ouzh an douar-bras. Kement-se a weler e Breizh, e meur a ledenez pe a c'hourenez, bet inizi gwechall : Seniz e Mor Bihan Gwened, Gourenez Kiberen...
Un nebeud irvi e Breizh[kemmañ | kemmañ ar vammenn]
- an Erv Vili, war aod ar Vro Vigoudenn, etre Penc'horz ha Beg an Dorchenn
- an Erv Saoz, pe Erv ar Saozon, e Morlenn Brest, war aod kumun Landevenneg
- Erv an Talberzh, e Pleuvihan
- Beg Terenez, e Plouganoù
- Erv al Leti, etre Beg Mousterlin, e Fouenant, ha Beg ar Ruzed, e Benoded
.jpg)
E broioù all[kemmañ | kemmañ ar vammenn]
- Erv Arabat pe Bir Arabat, e Krimea : an hini hirañ er bed (112 km)
- Farewell Spit, e Zeland-Nevez, e beg norzh Enez ar Su
- Chesil Beach, a stag enez Portland ouzh an douar-bras, e Dorset, e Bro-Saoz
- Erv Kourland, war harzoù Lituania ha Rusia (Oblast Kaliningrad)
- Lido di Venezia, etre Loc’h Venezia ha Mor Adria
- Dungeness Spit, e stad Washington, e Stadoù Unanet Amerika
- Sandy Hook, e New Jersey
- Ocean City, e Maryland
- La Manga del Mar Menor, war aod Murcia, e Spagn
Levrlennadur[kemmañ | kemmañ ar vammenn]
- A. Guilcher, P. Vallantin, J.-P. Angrand, P. Galloy, Les cordons litoraux de la rade de Brest, Bulletin du Comité Central d’Océanographie et d’Etudes des Côtes, 9, Genver 1957, pp. 21-54.
- Per Flatres, Douaroniez Breiz, Emgleo Breiz, 1995, pp. 28-29, 46-47