Eozen Kombod

Eus Wikipedia

Yves Louis Marie Combeau, pe Eozen Kombod, ganet e Ploueskad d'ar 25 a viz Gouhere 1799, ha marvet e Gwinevez d'an 13 a viz Gouhere 1870, a zo bet marc'hadour, troer, ha skrivagner brezhoneg. Daoust d'ar pezh zo bet skrivet a-wechoù, ne vije ket bet skolaer gwech ebet.

E vuhez[kemmañ | kemmañ ar vammenn]

N'ouzer ket nemeur a dra eus e vuhez. Marc'hadour-butun e oa e Gwinevez. E 1833 e voe galvet gant Armand Duchatellier, da zont da Gemper da labourat evel troer evit Kevredigezh Kendamouez Kemper. Lakaat a reas e brezhoneg pennadoù ar gelaouenn divyezhek L'Ami du Cultivateur (Mignon al Labourer) a-hed ar bloavezh 1833. Treiñ a reas fablenn La Fontaine, Le Laboureur et ses enfants, An Tieg hag e Vugale, embannet e niverenn 6 ar gelaouenn. Ne reas ket berzh ar gelaouenn bolitikel-se a glaske gwerzhañ mennozhioù a-du gant ar roue gall Loeiz Fulup Iañ, ha tamallet e voe brezhoneg Kombod hag e zoare-skrivañ, tostoc'h da hini ar Gonideg eget da hini distabil ar veleien.
Kaset e voe kuit e miz Here 1833. Distreiñ a reas da Winevez. Da get ez eas ar gelaouenn.

Tri bloaz goude e krogas da dreiñ fablennoù all.

Fablennoù[kemmañ | kemmañ ar vammenn]

Skrivet en deus fablennoù e brezhoneg war-dro ar bloavezhioù 1836 ha 1837. Dastumet int bet gant Daniel Doujet en ul levr, Fablennoù Jean de la Fontaine, hag a zo bet embannet gant Al Lanv e 2005[1].

Nozvezhioù[kemmañ | kemmañ ar vammenn]

Troet en dije ar Mil Nozvezh hag Unan, met da goll eo aet ar skrid.

Pennadoù kar[kemmañ | kemmañ ar vammenn]

Notennoù[kemmañ | kemmañ ar vammenn]

  1. Fablennoù Jean de la Fontaine, Troet e brezhoneg get Yves Louis Marie COMBEAU ha Daniel DOUJET. Embannadurioù Al Lanv, 2005.