Daouc'hrafiezh

Eus Wikipedia
Mont da : merdeiñ, klask

Implijet e vez an termen daouc'hrafiezh evit komz eus yezhoù hag a ra gant daou zoare-skrivañ. Ez-ledanoc'h e vez implijet ivez a-wechoù e-lec'h liesgrafiezh, kalz raloc'h, pa reer gant muioc'h a zoareoù skrivañ evit an hevelep yezh.

An daouc'hrafiezh a c'hell bezañ sinkronek, da lâret eo pa vez implijet an daou zoare-skrivañ war un dro, pe diakronek, pa'z eus bet implijet daou zoare-skrivañ a-hed istor ur yezh resis bennak.

Unan eus skouerioù brudetañ an daouc'hrafiezh eo ar serbeg skrivet koulz gant al lizherenneg kirillek ha gant al lizherenneg latin, daoust ma vez skrivet muioc'h-mui gant al lizherenneg kirillek goude ma oa bet disrannet ez-ofisiel ar serbeg-kroateg.

Arguzennet e vez ivez a-wechoù eo ar japaneg ur yezh daouc'hrafek dre ma ra war un dro gant daou sistem silabenneg (hiragana ha katakana) diouzh un tu ha gant sinalunioù (anvet kanji) diouzh an tu all. Evit tud all, avat, e rankont bezañ komprenet evel elfennoù eus un hevelep sistem.

Stank a-walc'h e oa an daouc'hrafiezh diakronek evit meur a yezh komzet en ez-Unaniezh Soviedel, evel an ouzbekeg da skouer, bet skrivet tro-ha-tro gant ar skriturioù arabek, latin ha kirillek.

Un dispac'h yezhel e oa bet ar c'hemm bet degaset d'an turkeg pa baouezas, dindan ren Atatürk, d'ober gant al lizherenneg arabek ha pa grogas d'ober gant al lizherenneg latin.