Caroline Mathilde von Hannover
Caroline Matilda Breizh-Veur, pe Caroline Mathilde von Hannover, pe Caroline Matilda of Great Britain (pe of Wales) e saozneg (1751-1775), ganet e Leicester House e Londrez, a oa ur briñsez saoz hag a voe rouanez Danmark ha Norge adal 1767 betek 1772.
Taolenn |
He buhez [kemmañ]
Merc'h e oa da Frederick, Priñs Kembre, mab henañ ar roue saoz George II, ha d'ar briñsez Augusta von Sachsen-Gotha.
He breur George a vo roue.
Tri miz a-raok d'he mamm genel anezhi e varvas he zad. Roet e voe dezhi anvioù-badez he moereb, ar briñsez Caroline Breizh-Veur ( 1713 – 1757). Savet e voe gant he mamm, pell diouzh al lez. Plac'h didro ha diorbid e oa, savet war ar maez, troet gant ar marc'hegañ, hogen desket ganti komz italianeg, galeg hag alamaneg, ha kanerez a zoare.
Dimeziñ [kemmañ]
Dimezet e voe e 1766, ha hi 15 vloaz, da Roue Danmark, Christian VII. Hennezh a oa kollet e spered, ha dilezel a rae e bried da vont da redek fouzhlec'hioù e gêr-benn.
Ar rouanez kaezh a droas he selloù ouzh medisin ar roue, Johann Friedrich Struensee, deuet da vout kentañ ministr.
E 1772 e voe torret dimeziñ ar roue ha Caroline Mathilde. Struensee a oa bet o klask modernaat ar stad a voe harzet ha dibennet. Ar roue Christian a sinas an urzhioù hep kompren, dindan levezon e lezvamm Juliane Marie, ha ne glaske nemet terriñ e eured. Caroline Matilda a viras an titl, hag a gollas he bugale.
He bugale [kemmañ]
Doua vugel he doe.
- Frederik VI ( 1768-1839), roue Danmark adal 1808.
- Louise Augusta ( 1771 - 1843), dimezet da Frederik Christian af Augustenborg. Krediñ a reer e oa merc'h da Struensee, rak tennañ a rae dezhañ, hervez ar poltredoù.
He marv [kemmañ]
Mervel a reas e 1775, da 23 bloaz, e kastell Celle, en Alamagn, e Rouantelezh Hannover , a oa d'he breur, George III, roue Bro-Saoz.
