Bikini (dilhad)

Eus Wikipedia
Mont da : merdeiñ, klask
Ur bikini pa vez gwisket
Ne vez ket aotreet ar bikini e pep lec'h
C'hoari gwalc'hiñ kirri en bikini

Ar bikini n'eo ket un tamm dilhad, met daou bezh dilhad a vez gwisket gant ar merc'hed evit mont da gouronkañ.

Ar pezh douget war ar bruched a c'holo an divvronn hag a zo staget er c'hein, evel ur vrennidenn.

Ar pezh all a c'holo ar c'haol hag ar revr, evel ur bragoù-bihan ordinal.

Etre an daou bezh eo dizolo ar c'hein hag ar c'hof. Heñvel-vi eo an daou bezh eta ouzh dilhad-dindan ordinal ar merc'hed. Tud zo koulskoude o deus klasket bihanaat anezho muiañ ma c'hallent.

Klasket ez eus bet ober bikini eus dilhad paotred da neuial ivez met n'en deus ket graet berzh ar ger evit se.

Istor[kemmañ]

Gant Louis Réard e voe ijinet ar bikini ha kentañ ma voe diskouezet a voe e Paris d'ar 5 a viz Gouhere 1946 er poull-neuial Molitor, ha douget e oa gant Micheline Bernardini, un dañserez noazh brudet en amzer-se er c'h-Casino de Paris. Diskleriañ a reas en doa dibabet an anv bikini abalamour da Enez Bikini, a oa bet un darzhadenn nukleel warni 5 devezh a-raok, gant ar soñj, hag ar spi, e vije ken brudet an daou bezh dilhad hag ar vombezenn a oa nevez tarzhet.

Savet e oa bet gantañ ar frazenn-stur saoznek : "The bikini, first an-atomic bomb!"

Goulenn ur breved a reas Louis Réard evit diwall un ijinadenn a seblant bezañ bet anavet gant ar merc'hed en henamzer hervez a weler war livadurioù kozh.

Micheline Bernardini gwisket gant ar c'hentañ bikini.

N'eo ket un degemer mat a voe graet d'ar bikini en e amzerioù kentañ. Sevel en e enep a reas an holl ilizoù, ha berzet e voe e meur a vro.

Ret e voe gortoz un toullad bloavezhioù a-raok ma teuas diouzh ar c'hiz. E 1956 e voe gwelet Brigitte Bardot er film « Et Dieu… créa la femme » o tougen ur bikini e danvez vichy. Evel-just e klaskas ar merc'hed yaouank ober evelti. Skoazellet e voe ar vrud gant ar ganaouenn Itsy Bitsy Teenie Weenie Yellow Polka Dot Bikini, kanet gant Brian Hyland, a voe kanet e galleg gant Dalida, Brigitte Bardot, Johnny Halliday ha Richard Anthony (Itsy bitsy, petit Bikini) a veze skignet er skingomz a-hed an hañv.

E 1962 e reas berzh bras a-drugarez da Ursula Andress, a zouge ur bikini gwenn ha gleb gadalus er film « Dr. No » : sec'het e voe an daou damm dilhad ha gwerzhet en ti Christie's e 2001: nemet 41 250 lur sterling ne goustas d'ar prener. E 1966 e voe tro Raquel Welch da wiskañ ur bikini ragistorel e-barzh "One Million Years B.C.". War-lerc'h ez eus bet graet ivez filmoù skinwel evit diskouez an tamm danvez-se, evel re ar rummad Baywatch, gant Pamela Anderson.

Abaoe dibenn an XXvet kantved eo deuet da vezañ ur gwiskamant ordinal war an aod.

Doareoù all[kemmañ]

Ar bikini-sport a ra berzh war an traezh

E lec'hioù zo avat e vez gwelet muioc'h a verc'hed yaouank e monokini pe e string.

Ijinet e oa bet ivez un trikini ha ne reas ket berzh, hag un tankini a blij d'ar re a ra sport a-hervez.

Mikrokini[kemmañ]

Mikrokini. Kini-kenañ.

Ur mikrokini zo ivez, hogen diaes ober un tamm dilhad eus un draig ken dister.

Levr[kemmañ]

  • Kelly Bensimon : Le Bikini, des années 1950 à nos jours, éd. Assouline, juin 2006.


Skeudennoù[kemmañ]

Bikini a-vremañ...[kemmañ]

... ha bikini a-wechall[kemmañ]

Marelladurioù eus Villa Romana del Casale


Pennadoù kar[kemmañ]


Commons
Muioc'h a skeudennoù diwar-benn

a vo kavet e Kerandafar, ar sanailh ma vez klenket dafar ar Wikipedia.