Banniel Alamagn

Eus Wikipedia
Mont da : merdeiñ, klask
Banniel Alamagn
Banniel Alamagn
Kenfeurioù: 3:5
Kod bannielouriezh FIAV 110100.svg FIAV normal.svg
Anv (pe lesanv): Schwarz-Rot-Gold
Degemeret e 1949
Livioù

██ black

██ ruz 485C

██ melen 7405C

Banniel stad (mor ha douar) (Bundesdienstflagge) ha banniel an arme (douar) (Kriegsflagge)
Banniel ar morlu (Seekriegsflagge)

Banniel Alamagn zo ur banniel triliv, gant teir bandenn a-led, du, ruz ha melen-aour (Schwarz-Rot-Gold en alamaneg). Evel m’emañ bremañ e oa bet degemeret ent-ofisiel gant Republik Kevreadel Alamagn d’an 23 a viz Mae 1949.

Implijet eo bet ar banniel-se ivez gant Kengevread Alamagn (1848-1866), gant Republik Weimar (1918-1933) ha gant Republik Demokratel Alamagn (1949-1959). Gant stad Alamagn ar Reter e oa bet implijet al livioù-se ivez, etre 1959 ha 1990, met gant ardamezioù e-kreiz ouzhpenn.

N’eus lesanv ebet gant ar banniel-se, evel ma’z eus gant bannieloù Danmark (Dannebrog), Breizh (Gwenn ha du) pe Stadoù Unanet Amerika (Stars and Stripes), daoust ma voe graet gant an droienn Dreifarb (triliv) gant lod eus dispac’herien an XIXvet kantved.

Istor[kemmañ]

N’eo ket gwall anavezet orin banniel Alamagn. Kroget e voe da implijout an triliv-se stankik, war a seblant, e deroù an XIXvet kantved, e-pad ar brezelioù a-enep Napoleon Iañ. Ar "Freikorps", ar strolladoù soudarded en em ganne a-enep ar C’hallaoued, a oa o dilhad el livioù-se (dilhad du, gant tammoù ruz ha boutonioù alaouret), eme lod. Evit tud all e veze implijet an tri liv-se dija gant impalaerien an Impalaeriezh Santel Roman, o doa bannieloù melen warno un erer du gant skilfoù ruz.

Bezet a vezo, implijet e voe implijet stankoc’h-stankañ an triliv-se, en XIXvet kantved, gant ar vrogarourien alaman o doa c’hoant da unaniñ ar stadoù a oa rannet Alamagn etrezo. Degemeret e voe da vanniel broadel Alamagn gant Bodadeg Vroadel Frankfurt, d’an 9 a viz Meurzh 1848. Met e 1850 e voe adsavet Kengevread Alamagn, evel ma oa bet abaoe 1815. Ne oa bet implijet an triliv du, ruz ha melen-aour, nemet e-pad daou vloaz. Ur wech divodet ar C’hengevread, abalamour d’an enebiezh etre Prusia hag Aostria, ha savet Kengevread Norzh Alamagn, renet gant Prusia, e voe degemeret ur banniel triliv all gant ar stad-se, gant bandennoù a-led du, gwenn ha ruz, e 1866. Un nebeud bloavezhioù diwezhatoc’h, pa voe savet an Impalaeriezh Alaman, e 1871, e voe kendalc’het da ober gant ar banniel-se, a oa diazezet war livioù Prusia (du ha gwenn) ha livioù an Hansa (ruz ha gwenn).

E dibenn ar Brezel-bed Kentañ e voe savet Republik Weimar e 1919 ha kemeret e voe da vanniel ganti an triliv du, ruz ha melen-aour. Pa yeas ar Strollad Nazi e penn ar vro e 1933 e voe dilezet an triliv-se ha degemeret daou vanniel ent-ofisiel evit ar stad, banniel an Impalaeriezh Alaman (du, gwenn ha ruz) ha hini ar Strollad Nazi, dezhañ livioù heñvel, an Hakenkreuzflagge, pe Hakenkreuzfahne, ur banniel ruz gant ur Swastika du en ur gantenn wenn. Goude 1935 ne voe implijet nemet hini an Nazied da aroueziañ an Trede Reich.

E dibenn an Eil Brezel-bed, pa yeas an Trede Reich d’an traoñ, e voe rannet Alamagn e peder lodenn gant ar broioù trec’h, hag unanet e voe teir anezho d’ober Alamagn ar C'hornôg (Republik Kevreadel Alamagn), tra ma’z ae ar pevare hini d’ober Alamagn ar Reter (Republik Demokratel Alamagn). Gant an div stad nevez e voe adimplijet an triliv du, ruz ha melen-aour, met en Alamagn ar Reter e voe ouzhpennet, diwezhatoc’h, ardamezioù ar stad komunour e-kreiz ar banniel. Abaoe m’eo bet adunanet ar vro, e 1990, e vez implijet an triliv evit Alamagn a-bezh.

Bannieloù alaman, a-hed an istor[kemmañ]

Bannieloù an armeoù[kemmañ]

Liammoù diavaez[kemmañ]


Commons
Muioc'h a skeudennoù diwar-benn

a vo kavet e Kerandafar, ar sanailh ma vez klenket dafar ar Wikipedia.

Flag of Germany.svg Porched Alamagn – Adkavit pennadoù ha rummadoù Wikipedia a denn da Alamagn.