Aeson

Eus Wikipedia
Mont da : merdeiñ, klask

Aeson, a oa mab da Kreteüs ha Tiro, a oa roue Iolkos e Tessalia. Tad an haroz Jason hag e vreur Promac'hus e oa.

Ur breur en doa, Feres, ha daou hantervreur, Pelias ha Neleüs.

Aeson ha Pelias[kemmañ]

Pelias a oa sot gant ar galloud ha c'hoant en doa da ren war Dessalia. Evit kas e vennad da benn e harluas Neleüs ha Feres, hag e kraouias Aeson e tourioù kastell Iolkos.

E-kerzh e chomadenn eno e timezas Aeson da Alkimeda, hag en doe meur a vugel diganti, hag unan anezho a oa Jason.

E vab Jason[kemmañ]

Kas a reas e vab Jason davet C'hiron da vezañ desket gantañ, tra ma oa moan e revr gant Pelias, o soñjal e c'halle bout diskaret, spontet dre ma oa bet lavaret dezhañ gant un orakl e ranke diwall diouzh un den ha ne vije nemet ur sandalenn gantañ.

Meur a vloaz diwezhatoc'h, pa edo Pelias oc'h aozañ c'hoariadegoù en enor da Poseidon, e tegouezhas Jason e Iolkos, goude kollet gantañ ur sandalenn en ur stêr a-greiz ma oa o sikour unan bennak da dreuziñ.

Embannet e voe donedigezh un den hanter diarc'hen. Spontet evel ma oa Pelias e c'houlennas ouzh e niz petra a raje ma vije dirak an hini a vennje e ziskar. Kas anezhañ da gerc'hat ar maoutken aour din, eme Jason. Ne voe ket lezet ar gomz-se da gouezhañ war an douar gant Pelias, ha kas a reas e niz Jason da grec'hina da bellvro.

Tra ma oa Jason o veajiñ, hir e dro gantañ, e soñjas Pelias e oa aet al lestr, an Argo, d'ar strad. Kement-se ez eas da gontañ da Aeson ha Promac'hus. En em lazhañ a rejont o lonkañ pistri, pe o muntrañ a reas e-unan , hervez an doareoù.

Hervez un doare all e oa bev c'hoazh Aeson pa zistroas e vab Jason gant e wreg nevez Medea da Iolkos. Dic'houzouget e voe Aeson gant Medea, ha lakaet e gorf en ur bailh. Alese e tennas Aeson, bev-pesk ha yaouank-flamm. Ha hi kontañ da merc'hed Pelias e c'halle ober kemend-all evit o zad. Ha merc'hed ar roue da zic'houzougañ o zad. Ha Medea da nac'h reiñ buhez dezhañ en-dro.